博評波神揭盅！「01博客陪你估波」一POST睇晒
一個月零兩日前，歐國盃未開波，01博評估波大戰率先揭開戰幕！
9位博客、前後38篇球評，比眼光比牙骹，健康過幫襯馬會。
有人估中牙擦擦，有人一時失手做燈神，有人睇波不忘講下歷史同時事；
咦，咁邊個係最終波神先？結果出爐，本屆博評波神係：
馬嶽！
馬爺幾乎由頭帶到尾；決賽前，更獨排眾議，敲中葡萄牙奪冠。
博評估波，點止估波咁簡單？30幾天球評大戰之路，一POST睇晒先！
一場估波大戰之誕生：淘汰賽前熱定身
是咁的，唔覺唔覺，01博評 嘅博客球迷，原來夠坐一枱！
丹尼爾、波三痴、運動公社 同馬嶽 就不嬲寫開球評；李聲揚同廖詩颺 又對足球好有熱情；加埋新加盟 01博評嘅撒拉夫同世界波，四年一度歐國盃喎，搵埋專業無限嘅 01 Sports 體育組，齊人！
咪講咁多，賽前熱身，博客話，講下故仔先：
分組賽階段
好喇，牙骹戰是咁玩的。第一輪：估分組賽出線的 16 隊，每估中 1 隊得 1 分。我哋精選咗 5 場賽事，考考班博客嘅眼光，每估中一次主客和可得 1 分。
第一場：開幕戰（11/6 法國 vs 羅馬尼亞）：當時幾乎全部博客都估中法國贏波；波三痴 比較另類，揀羅馬尼亞，以致一開閘稍稍落後。
第二場， 14/6 比利時 vs 意大利 ：比利時喎，世界排名第二喎，而意大利最紅就係鋼門保方，難免大部分博客熱估比利時贏；馬嶽同李聲揚 雖有先見之明，但都係估和，冇人估意大利贏，於是，估埋第二場，依然未見領先者。
接下來三場： 16/6 英格蘭 vs 威爾斯、20/6 瑞士 vs 法國 、22/6 克羅地亞 vs 西班牙，總算開始分到高下。
第一輪估波小結：5 場估中 3 場主客和（估過波都知其實唔易）嘅博客，分別係馬嶽、李聲揚同 01Sports（果然不失體育記者嘅名聲！）李聲揚仲即刻寫咗篇文，同大家分享「估波必勝法」添：《比馬會更準的估波必勝法》
又抵李聲揚咁牙擦擦嘅，喺十六強出線名單戰，佢同馬嶽都估中最多；以群體方式經營嘅單位運動公社同世界波，表現亦算理想（果然人多好辦事）；至於對波衫情有獨鍾嘅波三痴，就由於 5 場精選賽事僅估中 1 場，加上十六強名單估中最少，暫時包尾，落後榜首足足 5 分，輸在起跑線，想扳回，要似巴基之星矣。
分組賽波神：馬嶽、李聲揚
分組賽好文重溫：
淘汰賽階段
估波，唔做燈神，最勁係做咩？梗係做先知。分組賽都打完，我地請一眾博客做「先知」，估下邊度會奪冠。
於此，榜首雙雄開始各行各路。一如所料，德國最多人捧場，包括馬嶽；李聲揚貫徹自己力排眾議嘅寫文特色，冷敲分組賽表現令人刮目相看嘅克羅地亞；慘在東道主法國只得等做巴基之星嘅波三痴獨力支持。
都入到淘汰賽階段，咪估主客和，必須估晉級。
第一場，黑馬意大利對上屆冠軍西班牙嘅一場（28/6）：馬嶽 夠獨特，當大家睇好估西班牙，佢睇好意大利，仲寫篇文分析點解意大利「零球星」都值得睇高一線。結果唔使講啦，於是，榜首清晰左；榜尾嘅波三痴同撒拉夫，同馬嶽一樣具慧眼，估波積分榜距離稍稍拉近。
第二場係「死亡下線」嘅 3/7 德國 vs 意大利。值得注意的是，雖則馬嶽一早買咗德國攞冠軍，但呢場就同李聲揚一樣，揀咗意大利晉級，有冇策略性考慮？（因為無論賽果如何，佢都可保住榜首位置。）總之結果係榜首雙雄一起中伏，反而 01 Sports、丹尼爾、運動公社同廖詩颺都中，叻過榜首雙雄都冇用，排行榜冇大轉變。
四強戰， 德國 vs 法國（8/7），賽果是一地眼鏡碎，連累馬嶽連錯兩場，而波三痴竟然真係變身巴基之星，憑估中法國，取代馬嶽，成為估波王！其實喺「先知」賽，佢已經押注落法國。
球壇金句：波是圓的，勢估唔到，去到總決賽 葡萄牙 vs 法國（11/7）時，變成馬嶽與波三痴之爭（李聲揚無論如何都只能得第二）。呢場馬嶽同波三痴當然係分別揀咗葡萄牙同法國啦，而最後嘅結果大家都知道，係由 25 分鐘失去主力 C 朗嘅葡萄牙，憑住加時艾達盧比斯一球世界波擊敗東道主法國！
淘汰賽階段好文重溫：
馬嶽雖然先後受到李聲揚同波三痴嘅威脅，最後憑9 場估中 6 場（成功率超66%），勇奪博評估波王！至於李聲揚同一直表現穩定嘅 01Sports 分別奪得第二同第三名，同樣值得肯定！至於波三痴，雖則最後做唔成巴基之星，之不過由「先知賽」開始睇好法國，算好眼光矣。
P.S. 查實今次「01博客咁睇波」波神博評戰，除咗上述 9 個單位，亦有其他博客路過參戰，包括有「影子估波王」之稱（自稱？）嘅蔡子強。波神出爐，蔡子話，馬嶽要成為「估波王」嘅方法亦好簡單，就係「使橫手唔畀蔡子強參加」（當然係講笑……好似係）！計博評組話，今年立法會選情七國咁亂，一係蔡子同馬嶽轉戰立法會選舉，估下邊個做票王囉。
