飄泊十年航海夢 女遠洋船長終靠岸海事處
「行船」一個屬於70年代的詞語，亦彷彿是屬於70年代的職業。然而時至今日，仍有人花數個月，甚至數十年在遠洋船上未曾靠岸。既是為了將貨物安全送抵目的地，更重要的是為了實現在海上飄泊的航海夢。
「當你上到船，見到一望無際的海平面和天空連成一線，你就會知呢個世界比你所想像的更廣闊。」
「行船」接近十年，陳嘉敏（Carmen）由實習生做到香港首位的女船長，至今她仍然難忘第一次上船的感覺。不過，原來Carmen入行的原因並不是來自自少的夙願：「中學畢業時，仲未諗到實際想做咩，其他同學覺得我性格活動、成日跳跳紥咁，就建議我不如試吓去讀海事課程，於是我踏上咗航海呢條路。」
海上生活10年至今難忘
海事訓練過程歷時兩年，除了學習相關的航海知識外，還要了解各樣的船上操作實務。畢業過後，Carmen想都沒想就選擇了到遠洋船工作：「完成課程是可以選遠洋船或本地高速船，我覺得喺遠洋船見識同經歷都會比一般人多。」，下定決定的這個瞬間奠下了Carmen未來十年的飄泊生涯。
「上船嘅感覺好衝擊！比課本中描述仲要大的船、一直期待已久，想親身見到嘅發電機，一切一切都很新奇。」Carmen感歎道。懷着雀躍的心情，她開始了 一生第一次的旅途：「我所走的是澳紐航線，一行就要花上5至6個月，一開始是由實習生做起，打鐵、做油漆工、清潔等等，所有的工作都是為了將來晉升為伙長。女生主要係力氣唔夠大，體力勞動嘅工作會比較辛苦，但其他日常相處都沒咩特別，一人會有一間房同獨立廁所，周末甚至可以同船員BBQ。係父母會擔心，不過佢哋見我行咗幾程都冇咩事，之後都好放心。」
海上航行的旅途千奇百趣，Carmen自言曾見過鯨魚，亦有到過「理想生活嘅地方」瓦魯亞圖：「其實最難忘係做到好多其他行業做唔到嘅嘢，例如去到連飛機都唔可以去嘅地方，上到地面會好有成功感，見到唔同種族嘅人、體驗唔同生活習慣。」而運送貨物的過程亦是其寶貴的回憶：「有次試過運送一家四口馬匹去太平洋一啲島國，原來啲馬都會暈船，一路嘔又一路發呆，雖然佢哋本身有人專門照顧，但我哋都會去睇吓佢哋，呢個經歷都好得意。」
遊過後終泊岸加入海事處
千帆過盡，飄泊總要靠岸；Carmen在考上船長牌後就轉往海事處工作：「始終做咗自己嘅嘢10年，都要顧及返屋企人嘅感受。」在海事處工作，負責看顧新的船監系統，一切的生活看似與船上的大有不同：「做到後期，我都係喺船上畫航線圖、安排下屬嘅工作，其實同依家喺海事處入面做嘅都似。以前一直覺得海事處嘅航線指示冇咩特別，因為我喺船上都睇到，不過入咗去做之後先發覺，航監系統睇到嘅真係會比船上見到嘅更多。」
職業生涯的前10年於海上渡過，Carmen上岸後，仍繼續開展未來10年於陸上的「航海夢」：「現時入咗海事處兩年，之後希望可以調去唔同嘅小組，例如巡邏隊同驗船隊，想學多啲唔同嘅嘢。我都係唔想停下來。」
