【揮別議會．多圖】劉慧卿撤出25年隆亨辦事處　最難忘被人掟……

第五屆立法會議員的任期今天結束。從政25年、連任七屆立法會（局）議員的民主黨主席劉慧卿（卿姐），正式告別議會。有別於其他選擇在立法會度過最後一日議會生涯的退休議員，卿姐特地到開設了25年的沙田隆亨地區辦事處，正式交還辦事處鎖匙予房屋署，並與一眾職員及老街坊惜別。被問及25載最難忘的事，卿姐直來直往的個性不改，笑言「咁一定係個辦事處俾人掟屎！」

卿姐憶述，10多年前的一天，原本計劃夜晚為街坊舉行法律諮詢會，但當日職員黃太外出後發現「辦事處好大陣味，門上有啲屎」，黃太隨即急call另一街坊阿晶「有好嘢益你，快啲落嚟幫手」，再通知卿姐，卿姐通報傳媒後，有大批記者到場採訪，令黃太招架不住，更警告記者表示，「你再影我搵水fei（射）你㗎！」。

談及往事，三人笑到「見牙唔見眼」，阿晶更「埋怨」卿姐指，「好衰㗎你，拎呢啲嚟講！哈哈哈！」。自1993年已經任職辦事處職員的黃太透露，當年入職前，曾經擔心卿姐會好惡，「但佢同我講，話『你唔使驚㗎，我淨係對啲官惡咋』」，亦有義工笑言，卿姐的最大優點是直腸直肚，缺點亦然，「我成日話佢㗎，叫佢唔好咁直！」

任期最後一天仍為民請命  　卿姐：為工作畫上圓滿句號

位於沙田隆亨邨學心樓地下的辦事處，於1991年12月開幕，卿姐回憶說，「當日好似係幾十年最凍嘅一日，又落雨，個個著大褸，鄭海泉（前立法局議員）拎咗一大紮花嚟賀我，凍到係咁問我，『你有無需要咁凍先嚟開幕？』我點知啫，哈哈！」，轉眼就到了卸任議員的一天，職員拆卸門口的招牌時，卻怎麼拆也拆不掉，卿姐笑說，「我哋盡咗力啦，唔係唔想拆㗎」。

卿姐透露，她今早仍身處立法會，跟進受高鐵工程影響的牛潭尾村沒有井水的個案，期間她一邊開會，一邊透過whatsapp聯絡港鐵主席馬時亨，「我話單嘢咁樣搞唔掂喎，佢就叫我冷靜啲，唔係就爆血管」。卿姐形容，25年議會生涯是光輝歲月，又指在任期的最後一天仍可為民請命，可謂為工作畫上圓滿句號；她明天將和相識逾50年的密友同遊越南，揚言「返嚟再戰，後會有期！」

條稿未完㗎，一齊回味那些年的卿姐吧......