「失明食神」拍片惡搞《鋒味》教煮餸 搞笑背後曾因盲眼賣樓
「謝霆鋒都做到，視障人士都要做到。」失明人士鄧光寶拍片惡搞《12道鋒味》磨刀，轉眼已有4萬多人看過，但惡搞背後光寶是名副其實的「失明食神」。他在網上拍片教煮餸，而多得一手烹飪技術，帶領他走過人生低潮。
攝影：高仲明
負責飲食節目的「失明食神」光寶，拍片惡搞謝霆鋒《12道鋒味》，在facebook多達4萬人觀看，獲網民激讚，光寶笑稱「開下玩笑啫，謝霆鋒都做到，視障人士都要做到。」他一身功架並非只是「得啖笑」：光寶做過30多年街市肉檔，間中幫手煮員工膳食，平時送貨到餐廳與廚師打交道，順便偷師，對挑選食材、平民美食都有所研究。
縱橫街市多年，光寶終嚐開店做老闆的滋味；可惜只做了幾年，突然病發睡覺時突然抽筋咬傷脷，立時召救護車送院檢查，「個腦有網球咁大嘅瘤，兩個禮拜內要做手術」。他並沒想過會從此失明，「手術後望到光線、人影，突然對眼痕，捽兩捽，用毛巾抹一抹，對眼就睇唔到嘢。」光寶無法再到肉檔工作，唯有忍痛結業，積蓄所剩無幾，前路一片黑暗卻又低處未算低，為生活也要被迫半價賣樓，剩下一句無奈苦笑「乜都無晒」。
失明頭兩年，光寶長留家中，直到覺得「唔掂架喎，得個『零』喺到」，開始要為生活、家人著想，才走出家門尋求幫助，經介紹到香港失明人互聯會，解決食宿問題，現在為互聯會拍攝節目，推介各區地道美食，示範烹調心得。
電腦零件精細複雜，平常人驟眼一看難以分辨，人稱「盧sir」的盧海雙目失明，砌電腦時駕輕就熟，到底如何單靠人手砌機？「以前舊式電腦線正負極分顏色，咁真係要問人….依家愈黎愈好，好似插蘇咁啪上去就得，唔啱插唔好夾硬插，試試下始終會試到。」盧Sir為失明人士砌電腦，熱心助人，其實他曾因失明一事想過自殺。
他20多年前因深近視致視網膜脫落，經營的西餐廳要結業，「初初都唔知有事，望到眼底有水，好似隔住杯水望野，睇醫生先知係視網膜穿咗幾個窿。」發現問題時經已太遲，不能用激光醫治，由朦朦朧朧到漆黑一片，盧Sir坦言無法接受，「我以為係假嘅，無理由睇唔到野，應該有得醫嘅…成日喺到埋怨，點解會咁不幸，係咪做錯左啲咩？」最絕望時更想過尋死，解決一切麻煩。
盧Sir得到家人悉心照顧，慢慢走出陰霾，開始上復康班，學砌機、寫網站。他深信，資訊科技能提升殘障人士生活質素，如智能電話的地圖APP方便視障人士在外搵洗手間、食肆，即時通訊軟件擴闊社交圈子，「可以同全世界人溝通，令佢哋識野多咗，認知豐富好多。」他現時為「Wetv無障礙媒體」拍攝節目，教失明人士用智能電話，希望與時並進，幫助他們適應電話主導的新生活。
互聯會認為，各類殘疾人士過往只被動接受幫助，希望一改情況，便於去年8月成位「Wetv無障礙媒體」，由殘障人士拍攝大眾感興趣的節目，讓他們展現自己之餘，亦能讓市民了解到他們的能力。除了《光寶一叮》及《盧Sir跟Phone教室》，Wetv邀請到眼科醫生莊志強及「雷Sir」雷雄德，分別講解眼科疾病及運動復康。互聯會總幹事盛李廉指，用社交媒體宣傳是希望接觸更多群眾，未來計劃落區到學校、社區中心辦講座，邀請過來人及醫生講解眼疾，「在地」宣傳。
Wetv其中一位主持Rabi，坐輪椅是介紹各區的休憩好去處。到觀塘大草地佐敦谷公園拍攝期間，她就親身遇到不便。由於停車場要先取卡泊車，職員一開始知道她是傷殘人士，顯得「莫名其妙」，堅持她下車取卡。直到Rabi再三解釋，職員才親自拿卡給她。另外，公園內唯一一個傷殘車位，前面擺放了一個雪糕筒，Rabi要等待要求經過的路人幫忙，才能順利泊車。Rabi認為，現時本港康樂場所大多只得一個傷殘人士泊車位，並不足夠，較難與其他同是殘障的朋友一同使用。
