分娩歷生死 魚檔夫婦助養20兒童冀延續希望:心靈滿足大過去旅行

撰文:
最後更新日期:
每個生命都是一個希望。魚檔東主張金鳳(阿鳳)6年前懷著幼女,出現胎盤前置第4級,母女生存機會只得50%,「要出返嚟,就一齊出返嚟;要出唔返嚟,就一齊出唔返嚟!」新生命最終平安降臨,經歷生關死劫,阿鳳與丈夫陳杭武(阿Mo)經國際培幼會助養20名東南亞發展中國家的兒童,把「希望」植入他們心中,待種子發芽後再散播開去。
阿鳳與阿Mo 2014年起助養20個東南亞女童。(高仲明攝)
母親把子女看得比自己的生命都重,即使6年前懷著幼女,出現胎盤前置第4級,與死神擦身而過,阿鳳都沒有想過放棄胎兒,保住自己性命:「要出返嚟,就一齊出返嚟;要出唔返嚟,就一齊出唔返嚟」,唯一放心不下的是當時3歲大女穎穎。分娩前穎穎來探病,攬著阿鳳想她快些出院;阿鳳自知命懸一線,「如果我有咩事走咗,阿Mo又要搵食,基本上無人會照顧佢」,不敢向穎穎講明情況,眼淚待她離開才忍不住流下。
女兒生病最無助
熬過漫長晚上,幼女欣欣總算來到世上,阿鳳與阿Mo決定要找機會幫助不同的小朋友,但兩個女兒年紀尚幼,照顧不易,仍未想到實際行動。穎穎一次發高燒留醫5日,令阿鳳感受到育兒的無助之處,「一見到小朋友病,你坐喺醫院睇住佢失禁,嘔、燒,反晒白眼喺到抽蓄,醫生都幫唔到嘅時候,喺側邊唸阿彌陀佛都無用。」
穎穎(左)與欣欣(右)知道多了20個「姊妹」,開心到「喺張床到跳下跳下」。(高仲明攝)
夫助養兒童「先斬後奏」:送10個女俾你吖
直到2014年,魚檔生意上軌道,女兒慢慢長大,阿鳳與阿Mo才開始經國際培幼會助養兒童。阿鳳笑言,自己只是負責「講」,真正行動的是阿Mo,「中秋節前,阿Mo揸住疊野(培幼會信件)話:我助養咗10個小朋友…送10個女俾你吖」,過程相當驚喜,聽罷穎穎和欣欣更「開心到喺張床到跳下跳下」,希望長大後與「姊妹」一齊玩。幾個月後他們再助養多10個女童,分別來自柬埔寨、斯里蘭卡、印度等國。
阿Mo坦言,先前看過助養廣告,但一直無動於衷,「心諗呢啲事成日都有啦」。但經歷幼女差點兒未能出生,又留意到東南亞國家經常發生強姦案,女生安全和地位不受保護,「想像唔到點解會有咁嘅情況發生」,阿Mo自覺有責任幫助她們,冀將「希望」的種子植到他們心底:「佢哋健康成長,有能力嘅時候再幫返社區,咁樣延續落去。」
20名助養兒童每隔三、四個月會寄來相片和信件,與阿鳳和阿Mo分享現況,由初初衣衫濫褸,害怕鏡頭,到開始紮孖辮、穿校服上學,展露自信與笑容,矢志長大後要當老師,「我哋就知道係幫到佢哋。」
每月花4800元助養兒童,開魚檔的阿鳳與阿Mo稱目前仍可應付。(高仲明攝)
延續希望
栽培20顆「種子」發芽每月花4800元,親友誤以為阿鳳和阿Mo一定會用更多錢去栽培兩個親生女兒,惟阿鳳稱只安排女兒學小提琴及跆拳道,花費不多。阿Mo亦認為「應使得使」,在其他地方節省使費,「用啲錢做啲對於我哋嚟講有意義嘅事,心靈滿足會大過去幾多次旅行、去邊到玩。」
幼女欣欣知道「姊妹」們生活貧困,亦在爸媽身上學會節儉、助人,自己主動送贈舊衣物和玩具予親戚年幼的子女;但她不知道因自己來到世上,已為無數個家庭帶來希望。
阿鳳一家平時會吃蛋糕慶祝母親節,穎穎會畫卡、欣欣會做勞作送給媽媽。(高仲明攝)


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。