【世界盃】賭海沉淪起死回生都因一個APP 21歲仔:對唔住家人

撰文:鄧詠中
出版:更新:

四年一度的世界盃即將在俄羅斯開鑼,手機應用程式賭波活動席捲而來。21歲的阿言,3年前起用馬會手機應用程式投注,開始無賭不歡,欠債8萬元,靠借錢度日。萬念俱灰之際,阿言忽然想起馬會App提供求助電話,遂向社工求助。幸得家人支持,阿言決心戒賭。協助阿言的東華三院平和坊「戒賭輔導中心」指,涉及賭波的青少年個案逐年遞升,去年更接獲近70宗30歲或以下人士求助個案。香港大學社會工作及社會行政學系謝樹基教授估計,世界盃開鑼後首4至6星期,年青人賭波問題特別嚴重。他建議政府加強宣傳,並呼籲家長及老師留意年青人狀況。

Keep住每日要有錢賭,冇錢賭,個心會囉囉攣 ……會一直諗,有乜方法籌到錢,有乜方法可以賭。
阿言(21歲)╴前賭徒欠債8萬元
(蔡正邦攝)

同學分享賭波貼士

3年前,正就讀高級文憑的阿言,剛滿18歲。 同學間茶餘飯後的話題,總離不開足球明星動向及賽果。中學時期一度沉迷打機的阿言,畢業後則對電子遊戲失去興趣,終日無所事事。直至有一天,阿言與數名同學行經馬會,有同學即場分享「賭波貼士」,並鼓勵各人夾數十元「一齊玩吓」。詎料,阿言首次賭波即贏4倍。他坦言,「 咁易贏, 覺得賭錢幾得意,幾刺激,贏咗有好收獲,可以娛樂吓」, 其後每日均透過馬會手機應用程式下注。

「開始攞晒一日份人工去賭」

當時仍在學的阿言,每日均於超市做兼職,時薪僅40元。阿言深信小賭怡情,起初每日只透過馬會手機應用程式下注數十元,惟他其後參與讓球盤,每次落注最少200元,「開始攞晒一日份人工去賭」。阿言不知不覺墮入無底深淵,一發不可收拾。

用信用卡現金透支

阿言的同學逐漸停止賭博,但他相信「有賭未為輸」,越賭越大。他由200元一注,加至1,000元一注,更曾一晚下注數次。他直言,「可能因為我份人比較樂觀 ,輸咗錢,個心會沉一沉……有咩嘢,瞓醒聽朝再諗」。未幾,他開始以信用卡作現金透支。

「成績跟唔上,好沮喪……part time又搵得唔多,我唔想一世搵咁少,一世做𡃁仔。賭錢,係一種希望,希望可以靠賭錢賺到一個月人工!」阿言無奈指,對學習感到挫敗,「重讀費一科千幾蚊,試過攞晒(重讀費)去賭」。前路茫茫,阿言不願朋輩得悉其狀況,遂向財務公司借錢。

好多財務公司,無論一線定二線,只要有張大專學生證,證明到係大專生,就借到錢!
阿言

萬念俱灰之際 馬會App求助電話救一命

浮沉賭海,至去年5月,阿言連本帶利共欠8萬元。惟他依然相信,「有賭未為輸」,無計可施下,遂偷去家人放於櫃桶內約千元人民幣。

「嗰晚係度諗,輸錢唔緊要,但我輸埋自己嘅底線……我已經淪落到偷錢賭錢,被賭搞到越嚟越迷失!」阿言當晚輾轉反則,徹夜難眠。翌日他坐車返工期間,萬念俱灰之際,忽然想起馬會手機應用程式提供求助電話,「既然諗到個心咁煩,不如試吓打呢個電話」。阿言透過電話與社工簡述其情況,數日後再會面詳談。

阿言指,起初每兩星期約見社工,社工耐心分析其狀況,並鼓勵他向家人和盤托出,「逐個因素搵,幫我解開心結,希望我唔好再賭」。

初頭(唔賭波)真係幾唔慣,但賭錢係逃避!要面對返自己嘅問題……自己幫唔到自己,就要搵專業意見!
阿言

阿言幸得家人支持,助他清還債務,惟他深感愧疚。「爭屋企人嘅嘢,我諗我一世都唔會還得清。好想同佢哋講,對唔住。 好希望佢哋畀多次機會我,等我證明畀佢哋睇,我大個仔啦,控制到自己財政」!

各方鼓勵下,阿言漸漸走出陰霾。現時他從事服務性行業,打兩份工,盼努力還錢予父母。東華三院「平和坊」中心主任楊枬英表示,不少年青人對前路感到迷惘,「唔知咩工適合自己」,現時正為阿言提供職業導向輔導,每月與他面談一次,並防止他復賭。

真係唔好賭,唔好有種輸唔忿氣心態,長賭必輸真係啱 !
阿言

東華三院平和坊於今年3月至4月期間,訪問786名14至30歲年輕人,約三分二(66.4%)受訪者常用手機應用程式進行足球博彩投注,每月投注額中位數為400元,相比沒有用手機應用程式的年輕人的投注額中位數100元多出3倍。

平和坊表示,利用手機應用程式賭波,較簡單快捷,更可以直接以信用卡結帳。年青人不知不覺間會花費超出預算和能力範圍的投注金額,情况令人憂慮。

報告亦顯示,四分一(25%)受訪者認為,大型賽事「容易中」故會投注,更有44%人表示會為支持心儀球隊而下注。平和坊強調,賭博絕對不是表達支持的正確方法,年輕人應釐清觀念,以正面方式去支持心儀球隊,例如約朋友一起觀賽。

香港大學社會工作及社會行政學系謝樹基教授表示,香港、澳洲及新西蘭年青人賭波問題嚴重。新西蘭賭博問題基金會早前發出警告,由於遊戲機設計多以球類運動為主,與真實足球環境相似,「青年人容易覺得賭錢似打機,冇留意係賭真錢,真實贏面同輸面可以好大 」。他續指,青年人以『玩遊戲打爆機』的心態賭博,會不能自拔,「唔會留意輸幾錢,賭幾多時間」。

病態賭博3個警號

謝樹基指,家長、老師及家人應多加留意,年青人如出現以下行為,他或已成為病態賭徒。

1. 學業、工作及社交受影響
年青人或拒絕應酬 ,終日匿埋房內打機

2. 經濟出現問題
四出賺取外快,偷用家人的信用卡或「穿櫃桶底」

3. 大話連篇
「大話冚大話」,秘密賭博

謝樹基估計,世界盃開鑼後首4至6星期,年青人賭波問題特別嚴重。他建議政府加強宣傳「睇波不賭波」,並呼籲家長及老師留意年青人狀況。

【東華三院平和坊 - 戒賭輔導中心】
戒賭熱線:2827 4321/1834633( 按1字)
網站:http://evencentre.tungwahcsd.org/

【世界盃】香港01全力策動 區區有波睇! 免費睇波兼有禮物包