【港人菲製毒案】判決前夕 年老母親日夜為子祈福 望平安歸來
四名港人前年7月被指於菲律賓一艘漁船上因涉製毒案被捕，至今一直被囚菲獄，案件經歷超過兩年的審訊，於今天（14日）終有結果。港人家屬剖白兩年間於兩地奔波感受，慨嘆受漫長審訊煎熬，有感菲國司法緩慢，年老母親耗盡積蓄為救兒子，兩年來日夜誦經希望兒子平安，亦堅信兒子不會販毒。家屬希望今次審訊能獲得公平結果。
駕拖輪多年 首次到菲即「中伏」
其中一名案中港人盧榮輝原為長洲漁民，十多年前由其姐夫輝哥介紹下轉職駕駛拖輪，「由細睇到佢大，我最錫呢個舅仔」，兩人亦曾經共事數年，談起盧於菲律賓出事，駕船多年的輝哥指最初聽到消息亦感大惑不解，「未聽過會去咁遠（菲律賓）揸架船返嚟，可能以為去又有得玩，車隻船返嚟又可以搵幾日人工，梗係吸引啦」，他慨嘆盧為何輕易相信人，「去啲咁嘅國家都烏啄啄，結果咪中伏」。
七旬母不敢相信兒子販毒
年近7旬的盧媽媽，於盧榮輝出事前5日才與他吃飯，當時盧榮輝並未有提及到菲一事，直到事發後，姐夫輝哥收到朋友的消息，「你舅仔喺菲律賓被人拉咗喎！」，六兄弟姊妹得悉事件後無不愕然，但更艱難是如何將事件告訴年老的母親。「我哋事先約晒一齊，傾點同阿媽講，最後大哥話由佢講」，當日各人到母親家中圍坐，冷靜解釋事件，「叫佢冷靜聽我哋講，睇開啲，因為始終驚佢老人家」，盧媽媽坦言聽到消息後不敢相信，但坦然只能面對。
日夜誦經為子祈福
「有次打電話，我問『你究竟點㗎』，佢話阿媽你放心，我無做過啲咁嘅嘢！你信我」，盧媽媽稱兒子為人不錯，只是有時貪玩，但相信他不會販毒，「我哋啲小朋友唔會做啲咁嘅嘢，自幼都係做漁民」，盧姊又稱「如果佢真係有做過，我哋家人唔會咁努力去幫佢、去籌錢，因為佢真係無辜」。事發後，盧媽媽因年齡老邁未有到菲探望兒子，但兩年多來每日早晚都會坐於家中為兒子誦經祈福，保他早日平安回港，「我同佢講最緊要身體健康，我哋有念經，一定會維護你」，盧姊稱盧榮輝對今次判決很有希望，因他堅信自己無辜。
獄中非人生活煎熬 盧姊：好恐怖
兩年間家屬奔波兩地，一家人負擔起案件高昂的律師費及盧於菲獄的生活費，花光超過40萬，連盧媽媽的積蓄亦幾乎耗盡，只求兒子能早日脫離菲獄返港。經濟拮据之餘，內心的擔憂對眾家人更是煎熬，想起弟弟每日處於環境擠迫惡劣的菲獄，盧姊稱不期然便會落淚，「好淒涼，日夜都鎖住，食、瞓、痾都喺果度」，曾親自到菲獄探望，盧姊稱當時見到大批犯人被囚於細小牢房，感覺恐怖，「5、6個人瞓一張床，好污糟，監房門口就係坑渠同老鼠」。盧榮輝與前妻育有一名16歲女兒，於爸爸出事後，媽媽接連被確診乳癌，雙重打擊令她出現情緒病，幸好眾家人均對幼女十分關心，媽媽亦逐漸康復。
帶同衣服到菲 望審訊成功
經歷近兩年的審訊終於有結果，盧家準備到當地聽判決，亦會帶同一套盧的衣服到菲，希望能順利接他回來。審訊期間曾經發生法官被恐嚇換人、聘請的翻譯被法庭拒用、控方證人缺席等事件令審訊拖延，盧姊坦言未有想過事件會歷時這麼久，「最初諗幾個月就返嚟，無諗過隔咗咁耐」，盧姊認為菲司法制度緩慢，更感覺刻意被留難，「有時飛到過去都唔知有無上過庭，有無講過嘢，又時證人唔出席又阻你一堂」，輝哥則稱案件中證據如電視台片段、記者作證等，均十分有力證明四人清白，認為仍要拖延這麼久是不公義，「要受都受夠啦，兩年幾喇喎」。他們希望今次審訊能獲得公平結果，「期望佢（盧榮輝）一定無事」。
