【撞斃修路工】司機落網 遺孀:老公唔會返來 只盼三子健康成長

撰文:楊婉婷 陳惠嫻
出版:更新:

丈夫譚權慰深宵修路遭逢橫禍,遺孀尚未走出傷痛,嬌弱肩膀已要擔起家庭重責。肇事司機不顧而去,遺屬悲憤不已。幸至今午,警方帶來好消息,指肇事司機內地回港時被捕,遺屬始稍稍平復心情,惟譚太傷痛之情難以消去,眼眶泛紅,形容丈夫是四好的「好丈夫、好爸爸、好朋友、好員工」,哽咽稱﹕「就算拉到,我老公都唔會返嚟,我嘅家庭唔會完整。」
前路漫漫,譚太徬徨無助,負起養育三名年幼兒子的重擔,她坦言日後生活只能見步行步,「只想小朋友開心,健康成長就OK啦。」而譚太亦寄望路政署、外判商及修路公司各方面,加強修路工人的安全措施,因「修路工人為社會有貢獻,工作時係搵命搏。」

丈夫驟然離世,譚太獨力擔起家庭擔子,感到前路茫茫,只能見步行步。(陳惠嫻攝)

修路工人譚權慰慘遭撞斃,肇事的60歲綠Van司機許X彪不顧而去,更潛逃回內地,「著草」60小時後,許今午1時45分在羅湖過關回港時被捕,在西九龍交通部扣留,傍晚時份被送往伊利沙伯醫院。縱然涉案司機已落網,但人死不能復生,和諧的五口之家一夜間被拆散,遺孀譚太及三名分別12歲、9歲及3歲的兒子,承受著失去摯親之痛。

好多謝廣大市民關注呢件事,但就算拉到,我都覺得係我老公唔會返返嚟,我嘅家庭唔會完整。
死者譚權慰遺孀
譚太形容丈夫有四好,分別是「好丈夫、好爹地、好朋友、好員工」。(陳惠嫻攝)

譚太指亡夫有90分 三子未能消化父親驟逝

譚太今午接受《香港01》訪問時,坦言即使成功拘捕涉案司機,但丈夫離世已成事實,不會再回來家人身邊,家庭已不再完整。「佢係一個好先生,一個好有責任嘅先生,好Daddy,係一個好有義氣嘅朋友,好有責任嘅員工,你話佢有幾多分,我覺得佢係有90分。」譚太又指,丈夫生前疼愛妻兒,「佢對我好好,佢咁樣走咗去係好可惜,好不幸,遇上呢個交通意外被小巴司機撞成咁,搞到呢個家庭拆散咗,有個缺口。」

至於三名年幼兒子是否已消化父親猝逝一事,譚太指三子情緒仍未平復,「大仔接受唔到,二仔都係有情緒,唔開心囉,三子仲未知發生咩事,但都唔開心。」惟慶幸長子學會體貼母親,主動關心及照顧兩名胞弟,「大仔好乖好生性,欣慰係佢會講﹕『Daddy唔喺度啦,你唔好再激媽咪啦。』」

將來嘅打算,唔知,答你唔到而家,因為個心情好亂,仲未平復返。將來見步行步啦,漫長嘅日子,漫長嘅路,都唔知點講,唔知出年又有咩嘢發生。只可以講見步行步,想小朋友開心,健康成長就OK啦。
死者譚權慰遺孀

母親登門關懷 寄語女兒﹕做個好母親

對於日後的打算,譚太一臉愁容,感前路茫茫,坦言心情至今仍未平復,思緒混亂,未知將來如何是好,「將來見步行步啦,漫長嘅日子,漫長嘅路……只可以講見步行步,想小朋友開心,健康成長就OK啦。」

譚太母親得悉女兒家庭遭逢巨變,今午亦到其寓所探望及協助女兒渡過難關。眼見女兒傷心難過,對前路一籌莫展,譚太母親亦憂心忡忡,不時輕拍自己心口,只能寄語女兒要堅強,好好養育三子,「做一個好母親啦!」

譚太希望涉事司機勇於承擔責任。(王譯揚攝)
其實佢哋(修路工人)係攞條命嚟搏,佢哋做呢份工真係有血有汗,冒住生命危險嚟做呢一份工,做呢個修路工人。
死者譚權慰遺孀
涉案司機被押回西九龍交通部扣查。(黃偉民攝)

質疑小巴公司聘用有不良紀錄司機草菅人命

枕邊人驟然間遭奪命,譚太難掩悲憤之情,斥責涉案小巴司機和其營運公司不負責任,質問該名司機案底纍纍,公司仍予以聘任,形同草菅人命。她坦白指曾有埋怨,但「唔發生都發生咗」,只有接受事實,但希望司機勇於承擔責任,「我淨係想呢個司機做返自己份責任,承受返佢自己做錯嘅嘢,出嚟面對廣大嘅市民,勇於出嚟認錯。」

她亦指修路工人為社會有貢獻,希望「每位工人平安開工,平安收工」,並呼籲香港市民、路政署、建築業界及外判商等各方面,關心修路工人的人身安全,盡量為他們爭取更多的安全措施,以防再有交通意外發生,「其實佢哋真係攞條命嚟搏,佢哋做呢份工真係有血有汗,冒住生命危險嚟做呢一份工,做呢個修路工人。」她只希望,修路工人平安返工,平安收工回家。