網上流傳一段車CAM，兩名司機因為切線問題爭執，其中一方更持鉸剪指嚇。片段顯示為昨日（9日）下午5時46分，片主駕駛車輛由銅鑼灣邊寧頓街轉入怡和街，其間右邊一輛豐田七人車突然切線駛入，險釀碰撞。片主響號示警兼爆粗大罵「乜X嘢呀你！」、「X你老母XX！」身穿裇衫西褲的中年七人車司機亦怒氣沖沖，手持大鉸剪落車指向片主。

片主質問：「你嚇鬼呀？」中年漢反嗆：「我剪你呀，再X吖！剪唔X剪你，我最X多坐監！」雙方爆發激烈粗口罵戰。片主揚言：「我有Cam㗎！」最終中年漢一邊罵一邊返回七人車。

影片引起網民議論紛紛，有網民認為七人車司機觸犯法例，應該報警處理：「報警拉得，攻擊性武器」、「恐嚇喎，仲要擸架撐，不小心駕駛、藏有攻擊性武器再加埋呢條罪，真係入去慢慢坐啦」、「已經犯意圖傷人罪」；亦有網民理性分析，認為雙方均有問題，「畀人攝到位只怪你技術差, 有乜X嘢好X呢」、「佢唔啱，但你脾氣都好差，比人cut小小就響個長安咁嘈，自己又咁噪，影響心情，凡事都唔順利呀。」