【每逢大事講故事】美國大選A餐定B餐 第一千金你點揀? 

撰文:飛雲
出版:更新:

今屆美國大選希拉里鬥特朗普,相信大家同飛雲一樣都係抱住食花生嘅心態,要講老老實實政治,同立法會宣誓單嘢一樣「無眼睇」。計我話不如睇下靚女好過!可能你好唔gur特朗普咁有米,唔gur佢咁都可以選總統,點都揀唔落手,但要俾飛雲揀第一千金,我梗係揀個索架啦。
其實兩位貴千金,都係喺紐約政商圈鎂光燈下長大,大家嘅成長背景有不少共通點之餘,仲要係老友鬼鬼,依家望住老豆老母鬼打鬼,咪話唔老尷。

希拉里同克林頓嘅獨生女,香港人都應該唔陌生,車路士丫嘛,真係我細細個就聽過佢個名。至於美國人,亦會對特朗普家族一啲都唔陌生,尤其佢(啲)老婆同千金,簡直精彩過選美。35歲嘅大囡Ivanka喺今次選舉成日企喺老豆隔離,搶鏡過影過裸照嘅「特朗太」十萬倍。雖說有圖有真相,但相呢就唔post了(…面紅…),有興趣嘅讀者識做啦。

克林頓家族喺過去30年貴為政壇明星,也是特朗普發迹之時,兩家人早已認識,唔少人都知其實特朗普以前曾經捐錢俾克林頓基金會,大家都有自己嘅事業車路士同Ivanka早幾年透過老公認識,大家都係紐約政商圈名人二代,可謂一拍即合,一見如故。車路士更曾在接受Vogue雜誌訪問時,大讚Ivanka天生具魅力,前年一同在一個婦女組織典禮的紅地氈上,開懷說笑,似乎真心friend喎。

點解個畫面有聲?仲要係May姐嘅笑聲...哈哈哈哈(網上圖片)

成長背景似 老豆桃色風波中長大

回到1993年,克林頓入主白宮,車路士得嗰13歲。大約兩三年後,克林頓同萊溫斯基嘅性醜聞就爆出,做第一千金壓力已經夠大,老豆仲要唔生性,真係EQ低啲都搞唔掂,之後入埋史丹福大學修讀歷史,做過新聞主持,又為父母打理克林頓基金,前年更在牛津大學修畢公共衛生博士學位。更難得嘅係,時隔23年佢同父母關係仲咁好,今次輪到阿媽選總統,佢都出心出力,作為一個囡,其實已值一百分。

睇成語動畫廊都知,唔係個個第一家庭都咁和睦嘅。

同樣地,身為長女嘅Ivanka自細已成日跟住老豆,出席各式各樣商界場合,似乎對於爸爸嘅桃色醜聞已經見怪不怪。Ivanka 18歲就離開屋企去讀大學,頭兩年喺華盛頓喬治城大學就讀,之後再轉去賓夕法尼亞大學讀經濟。

雖然老豆成日口出狂言,Ivanka卻相當得體,人前人後不時讚爸爸,又話過去10年跟爸爸一齊為公司打拼,感覺無得頂。爸爸對囡囡都讚不絕口,話佢叻女,甚至話如果唔係自己個囡,一定要同佢拍拖。我啋~

特朗普話過,如果Ivanka唔係佢個女,一定會溝佢。

不過,特朗普同第二任老婆生嘅二女Tiffany,對老豆態度就唔係咁die hard,雖則有好俾面出席大大小小嘅拉票活動,但成長階段跟隨媽咪生活嘅佢,就明顯無Ivanka同老豆咁親,其中一次辯論仲俾人影到老豆想錫佢一下面豬仔,佢就好身手敏捷咁閃開,一副「喂唔使咁客氣啦」嘅模樣……

Tiffany媽媽亦講過,特朗普對呢粒女供書教學做到足,不過生活上一切都教唔到佢。對於爸爸侮辱女性嘅醜聞,Tiffany都有為佢辯護嘅,話爸爸教導佢地做女人都可以男人一樣咁叻、咁成功。不過Tiffany睇黎唔想靠父幹,既努力發展音樂事業,又去時裝雜誌Vogue實習。

特朗普同三位老婆共育有五名子女。

比起誠哥 特朗普家族都唔係好有錢啫~

Ivanka同兩個親生細佬,Tiffany,加埋現任特朗太生嘅孻仔,五兄弟姊妹名正言順係特朗普生意王國嘅「繼承者們」。特朗普集團估值35億美元(折合大約273億港紙),媽呀好多個0!! 不過都係徐子淇威啲,估計四叔身家有成249億美元(1942億港紙,咁囉),同我地香港首富呀誠哥當然亦仲爭幾十條街。

不過今時今日,咁樣做富二代係唔夠嘅,一於伊人當自強!Ivanka遺傳咗爸爸嘅生意頭腦,間唔中會上老豆主持嘅真人騷《飛黃騰達》客串下,過下明星癮,今日已經係特朗普集團嘅副總裁,仲有自己嘅時裝品牌,咁索做埋生招牌。不過今次為咗幫老豆選總統,已經得罪晒全世界所有女人,要杯葛佢嘅時裝品牌。孝順嘅Ivanka仍然死撐老豆,話美國最寶貴嘅地方就是人們有自由做想做的事,又話自己嘅品牌係希望給予女性力量,如果其他人要政治化,佢都無辦法。或者,善忘嘅人類好快就唔記得特朗普選過總統呢,特朗普輸咗都唔駛喊,錢仍然大把。

10多歲時,車路士跟着爸爸入主白宮之際,Ivanka也跟隨爸爸出席名流活動。

睇住民調,我諗大家會認為其實希拉里勝利在望,希拉里做左美國第一位女總統,亦會改變「第一夫人」嘅傳統角色,不少知情人士都認為,克林頓會協助希拉里外交及其他重要政策,打理白宮家頭細務則交比36歲嘅車路士,揀下窗簾布、負責搞下party、國宴菜單嗰啲咁(唔係叫克林頓做掛?),再次肩負起起第一女兒嘅職責。

兩位新娘子結婚時,都係揀着Vera Wang婚紗。

幸福人妻鬥放閃

相差一歲嘅Ivanka同車路士嘅命運或者注定有好多相似嘅地方,都係嫁咗個猶太裔老公兼做埋媽媽。又咁啱嘅係,兩女嘅家翁都分別因為逃稅及詐騙坐過監。已為人妻嘅Ivanka今年初仲為老公生咗第三個bb,一家五口成日喺Ig放閃。點解一家五口都可以咁靚嘅?!!!真係閃到飛雲眼都盲。車路士都唔輸蝕,雖然星味未及索爆Ivanka,但車路士最近都替老公生左個仔,湊夠一個「好」字,一樣咁幸福。

Ivanka老公仲有個小酒窩,葡萄死人咩?

當然比起特朗普家族,克林頓一家唔算超級富豪。然而兩位千金嘅生活,已經足夠令大家葡萄(係咪好想阿源上身呢……),住洋樓養番狗也許唔足以形容,就帶大家睇下示範單位!

左邊係車路士靚屋 右邊係Ivanka靚屋

車路士同老公喺2013年以1000萬美元買下紐約「最長」的住宅,長度延伸整棟大廈。近2000平方尺嘅住宅,樓底10呎高,擁有寬敞嘅開放式廚房。Ivanka一家同樣定居紐約,喺2011年豪花1600萬美元購下位於上東區Trump Park Avenue面積4200平方尺嘅頂層單位。

叫我阿媽nasty woman 你話點忍?!!!

今次總統選舉異常醜惡,特朗普直呼希拉里“nasty woman”,對於Ivanka同車路士嚟講,真正係一場友情考驗,不過佢地兩位都坦言好欣賞大家,仲當對方好朋友,見面都不談政治。人前答得咁得體,係真唔係咁大方?睇下邊個贏先講。

最後我問番你,A餐定B餐?Sorry,都唔到你揀。 

真係你的樣子如何,你的日子….都係唔好講喇,費事你誤會飛雲係外貌協會。

下集,飛雲再同你講下克林頓家族同特朗普家庭嘅恩怨情仇,記住睇,bye lu!