【每逢大事講故事】希拉里忍辱負重磨劍50年 結果還是逃不了魔咒
學柴九話齋，「人生有幾多個十年？」所以當機會來的時候，便要好好把握。呢個道理，飛雲當然曉得，而喺未有《巾幗梟雄》之前嘅半個世紀，希拉里細細個嗰時已經識。
她13、14歲的時候，適逢美蘇太空競賽，即係兩國鬥射人造衛星、送太空人去外太空果隻，甘迺迪總統未被行刺前，剛好講了句：「我們預備送太空人上月球」，正在看電視機的希拉里心諗：機會來了！雖然尚未成年，但決心要成為全宇宙第一位女太空人的她，自知機會只留給有準備的人，於是乎一股腦兒向美國太空總署（NASA）寫了封信，查詢如何能夠作好裝備，令自己成為一名太空人。
太空人夢碎 埋頭苦讀科科A
可惜50多年前的美國，男女平等方面，分分鐘落後過第三世界國家，對於她的熱情，NASA一盤冷水照頭淋，回信指：「我們不收女生，講完。」既傷心又失望，她只好自我安慰：我有大近視，運動神經麻麻，反正都做不成太空人。唔緊要，反正阿爸話讀好書最緊要，日讀夜讀，眼鏡片越來越厚，品學兼優自然深得師長喜愛。
「如果你認為女孩能當主席，實在是愚不可及！」
太空夢碎，只好寄情各種課外活動，去到高中，書蟲破繭而出參加學生會、校報，還參加級代表選舉，首次出戰已當選副主席，翌年再選時卻成為兩名男生的手下敗將，其中一人更撂下狠話：「如果你認為女孩能當主席，實在是愚不可及！（you are really stupid if you think a girl can be elected president）」應該連她本人都勢估唔到，呢句說話會在50年後再次咀咒她。
唔知係咪打擊太大，總之身為高材生兼智商140嘅佢，就轉咗去女校讀大學。無錯，就係好出名排名好高嗰間衛斯里學院（Wellesley College）。
從那天起我竟掉亂左右
希拉里成日扮平民女，查實佢個生意人爸爸曉治洛特咸（Hugh Rodham），是位頗成功的布商，傳統、保守、大男人果隻，當然係親共和黨啦，自小受家人耳濡目染，她13歲開始已經為共和黨總統、議員在社區內助選，誰不知去到衛斯里，乜都唔同晒，簡直係激死老豆搵山拜。
由細叻到大嘅佢，去到才女林立的大學校園繼續爆Seed，大一已當選校內青年共和黨會長，學業成績又好，頓成女生們偶像，然而美國當時的民權運動和越戰完全扭轉了她的政治取向，大三那年為主張反戰的民主黨參議員麥卡錫（Eugene McCarthy）角逐總統提名助選，繼而登上衛斯里學生的最高榮譽：當上校內學生政府組織會長。黑人民權領袖馬丁路德金被殺，她組織學生連連續兩日示威，在她領導下，活動未像多數大學般釀成暴力事件。政治立場由右轉左，話都無咁易。
畢業那年，她成為創校百多年來首位在畢業典禮上致辭的學生代表，參議員Edward Brooke發言後，希拉里在發言時還擊：「我們覺得，領袖們長久以來都在政治上利用『有可能』的藝術，現在的挑戰是，在政治上實行將看起來不可能的，變成可能的藝術。」她的演說獲全場起立致敬長達7分鐘之久。
跟我們印象不同的是，她在老同學眼中風趣幽默、和親力強，嘉倫威廉臣（Karen Williamson）說：「我們很多同學都認為，她會是美國首位女總統。如果在我有生之年女性能當上總統，一定會是希拉里。」
委身克林頓 然後……
有早知無乞兒，同學們又點估到，Cool到爆的希拉里，之後會在耶魯法學院遇到克林頓？兩人在圖書館邂逅，繼而一擦即着，希拉里讀埋博士克林頓都未畢業，她竟然為了他在學校留多一年，可見愛情的魔力，耶魯學費好昂貴㗎嘛。想當年，克林頓多次求婚，事業心重的希拉里害怕婚後失去獨立身分，一一拒絕。
後來佢哋當然都係結咗婚啦，如果唔係邊有古講。希拉里最初未冠夫姓，成為法律界女強人，在著名大行Rose Law Firm升到做合夥人，年年收入都高過老公，又是兒童法專家，有名譽有地位，仲要有社交手腕。克林頓當上阿肯色州州長後，她常常要請假，但老闆不肯放她走，無法啦，大客仔全部靠佢拉返嚟，因為希拉里公職多多，時常為兒童、婦女權益奔走，正義超人上身，好多大客都好Buy。
萬能嘅佢，竟然連炒嘢都有一手，1,000美元買活牛期貨，10個月大賺百倍至10萬美元，可惜希拉里無向華爾街發展，如果唔係？
如狼似虎的第一夫人
之後那些大家都知道啦，克林頓選總統，條衰佬夠膽死用「選我等於買一送一」，非常著數咁話，不過希拉里做第一夫人都威水過人，要特別在白宮西翼整個辦公室比佢，很多政策、用人都要經過她一關，成個武則天咁款。
同武則天一樣，做第一夫人當然滿足唔到佢，幾經辛苦捱到克林頓落台，年過半百的希拉里先可以做返自己咋陰功豬，選完參議員又選總統。2008年輸比奧巴馬出唔到選，今年，難得對面派咗個癲佬出嚟，咁好機會仲唔係我？等咗50年先等到個咁好的機會，點解點解點解點解要我輸？唔通，連個天都唔鍾意我？Ah Sor，唔小心將希拉里的心聲打咗出嚟添，講完。