【每逢大事講故事】翻開特朗普CV 睇睇slash世代總統搞邊科

撰文:飛雲
出版:更新:

美國總統大選搞咁耐,現在總算塵埃落定,如無意外(例如釋法),特朗普就會在1月20日正式就任為美國總統。飛雲對美國新聞都算跟得貼,但講左咁耐,花邊新聞就聽得多,對特朗普是何許人都始終所知不詳。到底特朗普能否「做好呢份工」,不如齊齊HR姐姐上身,睇一睇CV……哇咦,原來成70歲仲身兼多職,咪即係近排最興既「slashie」?

到底特朗普能否「做好呢份工」?(原圖路透社)

  軍校畢業 做慣大佬

1946年6月14日,特朗普含着金鑰匙出生,他的父親是美國大地產商弗雷德里克.特朗普(Frederick Trump)。唔講唔知,特朗普13歲時老豆話佢曳,決心送佢入紐約軍事學院「調教」一下,此亦成為他後來加入共和黨從政的重要資產。未聽過紐約軍事學院?咁都應該聽過西點軍校喇掛?兩間學校原來係鄰居,亦是美國歷史最悠久的軍校之一。特朗普在學校中相當活躍,又做棒球隊長又參加足球校隊,後來更在軍校中被提拔至上尉一職。

  三歲定八十 帶女返學校

但係!特朗普雖然身處軍紀嚴明的軍校,依然不改特朗普本「色」。他的舊同學後來接受訪問,話特朗普出名「律人以嚴,律己以寬」,周末偷溜出外之餘,還要帶美女回來!哎本身已經唔算好friend架啦,講女更加傷感情,同學心中大喊「公平咩!」

都咪話,特朗普後生都相當靚仔。(網上圖片/原圖美聯社)

  名校畢業 人前炫耀「我識字」

後來特朗普畢業後輾轉入讀賓夕法尼亞大學的沃頓商學院,對此他看來十分自豪,更將自己3名子女送埋入去(當然包括靚女Ivanka)。今次大選宣傳特朗普亦這樣說:「我在長春藤大學讀書。我有很高教育程度。我識字,我識最好的字。」希望教佢英文嘅老師聽到都唔好太傷心。但不要緊,人哋特朗普從商嘅,又唔係教書,未畢業就入daddy公司,唔通好似你哋班廢青咁四圍send CV咩~

雖然特朗普強調自己名校出身,但其英語水平常被質疑。(原圖路透社)

  工作經驗:破產老闆

特朗普做生意都唔知算唔算有一手,他一直經營房地產、酒店等生意,呢度起嗰度起,但15年內申請了4次破產,對此他這樣說:「不要說我破產。我從未破產,只是像其他大生意一樣用法律取得好處——醒目!」

via GIPHY

  選美搞手 出錢出力 

要過閃亮亮的人生,特朗普怎會只滿足於商界。他亦進軍娛樂事業,出錢又出力,成為環球小姐的主辦者。為咗睇女仔,咁仆心仆命,仲要無私分享畀我哋呢班麻甩佬,飛雲諗起都覺得好滾動啊!

飛雲承認揀呢張相係有啲私心……(環球小姐網站)

  演員/主持

特朗普唔只做幕後玩家,幕前都要玩埋一份。最廣為人知,就是他主持的真人騷《飛黃騰達》,一句"You're fired”深入民心。另外他亦有參演不少電影,包括《慾望都市》、《寶貝智多星2》等,還有為他帶來業界爛片大獎金草莓奬的《做鬼也風流》。

相關文章:10件你不知道有關特朗普的事

  無政治經驗 臨老轉行容乜易

喂喂,講左咁多,全部都唔關政治事,咁HR姐姐好難搞架喎。哎飛雲都唔想架,問題係除咗捐下錢助選外,無乜得講丫嘛。唯一係佢政治立場經常搖擺不定,就正如佢大學所在地一樣,正正係搖擺賓……sorry,太順口。大家都知佢家下係共和黨啦,但原來2001年至2009年佢曾經加入民主黨,擺嚟擺去係點解呢?佢自己話,因為覺得共和黨太右,而民主黨太左。吓!家下啲人個個話你係大右派喎!

佢家下紅色呔~又變返打藍色呔~(網上截圖)

  民主共和都唔啱玩

1999年特朗普接受CNN訪問話:「我是個相當保守的人,在社會議題如醫健等,我則算是自由派……我不認為任何人真的說得出我想聽的話,亦不是其他人想聽的話,我見到的。」

  兩次話參選 第三次得咗

喔原來係咁!唔怪得自己出嚟選啦,自己聽自己說話,順耳好多架嘛!其實1988年及2000年特朗普都公開話想選總統,但你話選就選到咩?但世事就係咁奇妙,之前兩次都落空,今次奇蹟般勝出,如願以償。所以呢個世界真係好勵志,而家無,但將來會有,唔需要成日葡萄人,你話係咪先。

乖豬唔好喊啦,希望在明天丫嘛,你睇特朗普!(網上截圖)

  選總統就減薪 阿生你好串喎

無相關經驗、70歲人臨老轉行,完全無問題,所以美國夢呢真係好動人嘅,只係少不免要減下人工囉。特朗普之前上訪談節目《吉米法倫今夜秀》時,開玩笑說自己選總統是為了「大幅減薪」。哎呀唔啱分啲畀我呀嘛。

睇睇個訪問,原來特朗普都幾有幽默感。仲畀主持人整亂佢寶貴嘅頭髮。

  當選即示威 特朗普好頭痕

特朗普係節目上面仲話,自己最擅長「把不同的人帶到一起」,真係好似梁特話「無唐營無梁營只有香港營」咁呀。望住全美國周圍都示威,飛雲突然覺得特朗普真係好了解自己,本身三唔識七嘅人都聚埋一齊——示威。哇,呢個故事雖然講唔出咩大道理,但真係,好有親切感。

一當選就示威,呢個世界仲有邊個有如此號召力……咪先,我哋好似識一個。(路透社)