【恥力全開】中佬肥腩腰袋Dad Bag 隨心所欲野外露出士啤呔

撰文:黃正軒
出版:更新:

腰袋和腰包,不知道你印象中是何種人士使用居多?山客?跑手?地盤工友?裝修師傅?警察?以上皆是,方便裝隨身小物。不過我諗身邊最常見的都是在公園留連的阿叔阿伯吧。
多得Rich Chigga這印尼Trap界超新星,把扣鈕Polo、短褲襯個Reebok Fanny Pack的中年爹地裝扮變成潮Look。正是「醜到盡頭就是Dope」的經典範例。
面對樽頸位,創意總有走回頭路的時候,賣往日情懷實無死。時尚界、運動商紛紛行90年代復古風,加上Hip Hop等街頭次文化推波助瀾,近年越來越多後生仔對笨重阿伯波鞋和累贅Fanny Pack等老土單品產生興趣,加入這股追求懷舊「醜之美」風潮的行列。

行行下街突然見到有條友拉開自己個肚攞嘢都咪話唔驚!(Dad Bag)
+3

腰袋、腰包仰或Fanny Pack(美稱)、Bum Bag(英稱),向來是不少為人老竇,阿爺的中老年男人必備單品,便攜好用但觀感累贅,絕非有型有款。只是網絡新世代興老土當有趣、刻意自我醜化、鍾意自嘲嘲人也是時下年輕人的社交文化,這過時單品也不知不覺開始紅了起來。

西人愛把中坑們中年發福、彷彿身懷六甲的啤酒肚稱為「Dad Bod」(爸爸肚),是「Daddy Body」的縮寫,近年成為了網絡潮語。小鮮肉、大隻佬的六舊腹肌和人魚線固然性感,中佬那響起中央肥胖警號之「士啤呔」對某些女生來講亦有其成熟魅力,學曾志偉話齋「打和啦!」

Dad Bag是士啤呔也可當駕駛安全氣墊?(Dad Bag)
啤酒同啤酒肚當然襯到絕。(Dad Bag)

來自英國倫敦的創作人Albert Pukies似乎頗具食字天份,把Bum Bag跟Dad Bod結合變成「Dad Bag」,更將之設計成一個有住中年男士腹部形狀、膚色甚至凌亂體毛的腰袋,都幾重口味。雖然那些毛髮只是Print落袋的相片圖案而不是真係一條條突出來下垂;由於像真度實在太高,戴住佢出街,驟眼望落去就同「野外露出」自己的士啤呔無分別,少啲恥力都唔掂。但當你無端端拉開Dad Bag取物時,也許感覺太超現實恐怖,可能會嚇死周街的寶寶。

古語有云:「丞相肚裡可撐船」,來自宋朝名相王安石氣量大的軼事;今有「中佬肥腩可裝嘢」,簡直可媲美叮噹心口個四次元百寶袋,把Bum Bag的「醜之美」發揮到盡,無疑有少少變態但幾好笑,介乎愛與怪的邊緣。可惜原創者Albert暫時仍在招攬製作夥伴,Dad Bag離正式生產尚有一段時間,今年萬聖節想買來嚇鬼的朋友怕且都要稍候一輪。

有興趣的朋友可移玉步到Dad Bag官網Instagram等消息,亦可到Albert官網睇下他其他的搞作。

Albert還設計了一系列不同膚色和體毛密度的Dad Bag,The Sherman那款死屍蒼白加超長亂毛真係好核突!(Dad Bag)