【讀者創作.短篇】我係秦始皇:當一代帝王投胎到2019……

撰文:
最後更新日期:

【文章原刊於01撐場,歡迎下載香港01 app,與更多作者一同討論喜愛話題。】

「你好,我係秦始皇,其實我無死!

我喺西安有100億噸黃金,只需要2000蚊就可以解凍。

你入2000蚊落我戶口,等我重新登基,畀你統領三軍!」

坦白講,見到呢個騙案訊息,我好嬲。

唔係嬲有人想呃我錢,而係......我先係秦始皇!呃錢還呃錢,點可以用朕嘅名義?

呃錢還呃錢,點可以用朕嘅名義?(VCG)

呢件事說來話長,其實我唔係無死,我當年真係死咗,正常地落地府投胎啦。

點知,因為我生前做得太多壞事,背負太多人命債之餘,

又做咗好多好事,咩統一六國、統一文字......大家中學歷史都應該有讀「秦始皇的功與過」。

歷史學家嘈「功大於過」定「過大於功」都嘈咗咁多年,何況地府嘅會計師樓?

要計清楚我要喺地府服刑幾多年,投胎可以投個咩人家,都幾花時間。

計咗幾十年先搞清楚條數(我懷疑佢地都係是但交個答案上黎),我要喺地府服千幾年嘅刑。

渾渾噩噩,一直到工作人員通知我,話「刑期完畢,可以投胎」,並且簡介投胎流程。

我只問咗一件事:「係咪一定要飲孟婆湯?」

我唔關心我投胎會變成咩人,我上一世係秦始皇,我仲可以變成咩人,係會更加出色?

一旦飲咗孟婆湯,就代表我嘅功績都化為烏有。

工作人員皺眉:「唔飲孟婆湯投胎,要受多五百年嘅刑罰,無人會咁樣揀。」

我受刑嘅第一日,好痛苦、第一年,好痛苦,到一百年果陣,其實已經無乜感覺。

再多五百年,又算係乜野?

帶住秦始皇嘅記憶同能力轉世,我唔信我會唔成功。

於是,我受多五百年刑,連比我遲入地府嘅劉徹,都已經離開,我先踏上投胎之旅。

於是,我受多五百年刑,連比我遲入地府嘅劉徹,都已經離開,我先踏上投胎之旅。(VCG)

呢一世,我係一個普通家庭出生,外表無咩特別嘅男仔。

即使唔飲孟婆湯,投胎過程中,記憶都被封印。

即係話,我唔係「一出世就識講野,三歲識作詩,八歲天下無敵」果種天才。

直到18歲,我先恢復晒作為秦始皇嘅大部份記憶。

而呢個時候,我已經被世人標籤為一個宅男。

而呢個時候,我已經被世人標籤為一個宅男。(《海派甜心》劇照)

我本來諗住讀政治,創一番事業,

奈何我英文天賦實在太差,公開試英文唔合格,就算中史超班,都考唔到大學。

我到處同人論政,結果俾人起底,話:「你大學都讀唔到,扮咩專家。」

喂,我係秦始皇,秦始皇都無資格講政治?

原來呢個世界,你講野可唔可信,唔係睇邏輯,而係睇你有咩資歷。

我無辦法靠實力上位,苦惱緊嘅時候,我就收到果個「我係秦始皇」嘅騙案訊息。

呢個時候,我再覺醒咗一段記憶,係寶藏!

狡兔三窟,雖然我啲兵馬俑俾人掘晒出黎,但作為一統六國嘅帝王,點會無後備。

我喺唔同嘅地方,都興建咗滿佈機關嘅地下室,本來係用黎做避難所。

避難所入面自然有好多日用品,雖然唔係黃金,但時至今日,絕對係價值連城嘅古董。

呢一次,我要名利雙收!

避難所入面自然有好多日用品,時至今日,絕對係價值連城嘅古董。呢一次,我要名利雙收!(《鬼吹燈 精絕古城》劇照)

我先放出風聲,話我係秦始皇轉世,知道秦始皇喺咩地方埋藏咗寶物。

當然個個都當我傻仔啦,我就先畀出一個最少寶物機關嘅地點。

真係有考古學家去掘,掘出寶藏,令所有人震驚。

好快就有國家考古團隊黎搵我,恭恭敬敬咁稱我為皇,提出跟我去尋寶。

有人手,當然好。

我已經計劃緊,掘出古董後,點樣利用果筆資金,去建立我嘅勢力。

我帶住考古團隊,破解機關,搵咗好多古董出黎。

「辛苦晒,賣咗古董之後,我會分番辛苦費畀大家。我一定唔會虧待自己人。」我都識禮賢下士架。

「對唔住,呢啲全部屬於國家一級文物,係唔會歸你私人所有。」考古團隊嘅領頭人冷笑。

「但我係秦始皇,呢啲係我嘅財物......」我瞪大眼睛,不怒而威,但就俾人塞住把口,甩咗出去。

之後我有報警,但所有法例都唔支持我,唔支持一個投胎轉世嘅皇帝。

考古團隊沒收我嘅財物,連法例都唔支持一個投胎轉世嘅皇帝。(VCG)

好彩我仲有後手,我無將所有藏寶地都話晒畀人知,我自己仲收埋咗兩個藏寶點。

我打算自己組織可靠人手,再去發掘。

但我每次出門口,都覺得有人鬼鬼祟祟咁跟住我。

我估到,個考古團隊都對我唔放心,覺得我仲有收埋藏寶點。

風頭火勢,我唯有先忍一忍。

無錢,就先賺名氣。

我以為,「我係秦始皇轉世」呢件事曝光後,我會一炮而紅。

點知雖然有幾份報紙報導,但大眾完全無反應,於是都無後續報導。

邊個係秦始皇,點緊要得過女明星拍拖?

秦始皇,只係存在於中學歷史書上嘅一個名字,代表沉悶同考試。

我以為,我會因為「我係秦始皇轉世」一炮而紅。但其實,秦始皇,只係存在於中學歷史書上嘅一個名字,代表沉悶同考試。(VCG)

日子耐咗,只有研究秦始皇嘅教授搵我做訪問。

佢地得到第一手資料後,再出版嘅論文,大幅提升咗佢地係學術界嘅地位,亦有人升職加薪。

於是佢地......請我飲茶。

我明嘅,雖然教授人工好高,但學術呢啲野,點可以講錢呢?

諗下諗下,我不如自己做教授。

我寫咗幾篇講秦始皇嘅論文,但無一個期刊肯收我嘅論文。

因為我雖然係秦始皇,但我無相關學位,文章就無可信性。

兜兜轉轉,當年一統六國嘅秦始皇,依加喺補習社門口排緊隊。

我要報個補習天王嘅英文班,再考公開試,讀番個歷史學位,令自己可以名正言順咁「研究」秦始皇。

實力,好重要;

投胎,更重要。

實力,好重要;投胎,更重要。(VCG)

作者簡介:陳美濤

中文系畢業生,本地小說作者,以「貼地荒誕」為創作路線。對武俠小說情有獨鍾,喜歡分享個人見解。已出版小說:《無緣化蝶》、《港女九陰真經vs女神孫子兵法》等等,另有主持「口述武俠」影片頻道。

作者Facebook專頁:https://www.facebook.com/tomato28

想分享作品給更多人看到? 請即下載香港01 app到01撐場發表精彩創作!或將作品電郵至ugc@hk01.com,隨時敬候來鴻!

【編按:文章題目為編輯所擬,原題為「我係秦始皇 [短篇小說]」​】

(以上文章內容均屬用戶提供,香港01不為任何用戶內容而衍生或遭受之任何損失或損害承擔責任。)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。