揸車先嚟電話響?!│Sci Papa

撰文:
最後更新日期:

筆者平時一坐上的士,必先留意的,就係佢車頭有幾多部電話,因為電話愈多,作為乘客就更要打醒12分精神,因為每一部電話,每一次響機,每一個短訊都可以係交通意外的元兇!

【編按:作者為Sci Papa】

的士司機唔顧自身及乘客安全,都可以話係為咗搵食,值唔值得體諒都要再作討論。之但係,如果父母揸車載住小朋友都用或甚至玩電話,咁你又點睇?

美國費城兒童醫院,針對760個有4-10歲小孩的父母做咗一個調查,發現有大約五成父母,在過往三個月,係揸車接載小孩時有傾過電話,當中仲要有不少連"hands-free"都無用,一邊揸車一邊用手揸住個電話傾。而有三成父母就邊揸車邊睇或甚至傳送短訊,更離譜係有一成多嘅父母竟然揸住車黎玩社交媒體!
 

雖然不少司機覺得自己技術過人,所以掉以輕心,但係美國就有四份一的交通意外,是由於司機分心而做成!咁香港呢?根據運輸署的統計,因用電話而發生的意外只有一宗,低到令人難以置信;但細心啲睇清楚,其實有4,371宗意外是因為司機分心而引致,只係唔知為咗乜分心唧!

香港唔係立咗法唔俾司機揸車時用電話咩?又根據番運輸署的網頁,原來用電話唔一定會犯法㗎!用手揸住個電話係犯法,如果隔離位個乘客揸住個電話俾你傾電話就無事,反而用手揸住個免提裝置又係犯法,不過只要唔係揸住個電話,就算用手指撳電話都唔係犯咗呢條法例。依家咁多裝備可以將部電話放係車頭,睇黎要犯呢條法例都認真唔容易;不過,不小心駕駛其實都係犯法,不過犯咗唔同例。

老實講,坐的士你叫個司機唔好用電話,真係仲慘過打爛佢嘅飯碗,但坐屋企人揸架車都希望可以安全至上!其實香港咁細,揸車點對點最多都唔使兩個鐘,又係咪真係要放個電話係車頭用呢?尤其當你接載住一家大細,要打醒12分精神時,又點可以分神俾個電話呢?

揸車先黎電話響?其實電話響又有乜好怕喎?過一兩分鐘,就會飛咗去留言㗎啦!

References:
https://www.jpeds.com/article/S0022-3476(18)30772-8/fulltext

https://www.td.gov.hk/filemanager/en/content_4909/f3.8.pdf

https://www.td.gov.hk/en/road_safety/safe_motoring_guides/your_car_is_not_a_phone_booth/q_n_a/index.html

Sci Papa (專頁:Scientific Papa

喜歡科學,但更喜歡老婆跟女兒。覺得科研跟「湊女」都是要有極度的耐性,不怕失敗,還要懂得自我反思後用不同方法再嘗試!將育兒及科學融合,期望伴著女兒走一條快樂的成長路。

《香港01》App,瀏覽更多親子資訊,立即下載: https://hk01.onelink.me/FraY/hk01app



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。