【毛孩與小孩】愉快初接觸的4個注意事項│Wilma媽虎羽有云
同小朋友外出，總有機會遇上毛孩。有時候佢哋爸媽都會邀請小朋友去同毛孩互動，以下有幾個小貼士俾各位同毛孩們互動時愉快相處。
【撰文及攝影為Wilma】
一）讓小朋友觸碰毛孩前先問毛孩嘅主人
如果有人唔問你就摸你小朋友嘅身體，你都會覺得有問題吧？毛孩嘅主人亦一樣。而且每隻狗狗脾性唔一樣，唔一定鍾意同小朋友相處。先問準主人，除咗係應有禮儀亦係安全第一步呢！
二）不要突如其來嘅觸摸
任何人失驚無神掂你，你都嚇一嚇吧。要教導小朋友掂毛孩前要先俾毛孩嗅一嗅小朋友嘅手仔，等佢明白小朋友唔係攻擊佢，雙方確認冇敵意就俾佢哋接觸吧！
三）餵毛孩食嘢嘅手勢
唔止小朋友，其實連大人好多時餵狗狗食嘢嘅手勢都習慣用兩隻手指揸住粒零食俾佢食，咁係大錯特錯。你兩隻手指有機會仲大過粒零食，同埋毛孩們心急起上嚟，點樣可以同你玩IQ避障礙物咁避開咬唔倒你兩隻手指？
將食物擺喺你嘅掌心，咁狗狗就好難咬到你喇！
雖然小虎係隻食得好溫柔就哂力嘅哥哥，但因為魔王芊實在太唔怕狗實大把機會餵其他狗仔，所以最近我哋都開始教緊佢正確餵小虎食嘢嘅手勢了。
四）大人必須看顧
連小朋友都會打交搶嘢，就算毛孩幾錫小朋友，都有機會佛都有火㗎。而且大部分嘅嬰幼兒初期接觸動物，都唔識就力（但一定要教！唔好以為BB仲細你教佢佢唔識咩叫細細力，你唔教，佢就更加冇機會識。）整痛毛孩佢哋反抗係人之常情。大人真係要好好睇住呢。
以上係Wilma媽嘅小心得，其實只要識得同毛孩相處嘅禮儀，小朋友同動物玩真係百利而無一害，亦係教小朋友善待生命嘅最好教育。
芊羽Wilma & 小虎
2017年7月20日，擁有毛孩小虎的家添了一個小女娃芊羽。 這裡記錄兩個淘氣蛋的日常瑣事，和芊羽媽的各樣分享。
記者向NPV非牟利獸醫服務協會查詢，教育及傳訊幹事Candy Ngan表示Wilma的心得具參考價值，而且意識很好，知道與毛孩孩接觸時應有的禮儀。另外，根據多次到學校進行教育講座的經驗，她亦有下以補充，期望小孩與毛孩相處有更好的體驗：
1：毛孩們各有敏感部位，接觸前應先主動問主人甚麼位置不能摸。Candy舉例有些動物已經生育多次，屁股或尾部會較敏感，觸碰時即使沒有立即反抗，也有可能會積聚壓力，然後突然反咬小孩。
2：不應從毛孩的旁邊遞出食物，如毛孩看不見小孩，又忽然有物件進入視線範圍，毛孩便容易被嚇到而激動。接觸時小孩應身處在毛孩的前面，當毛孩看到小孩的一舉一動，便不會被嚇到。
3：除了把放在手掌心，餵食前後亦應清潔雙手，因為小孩可能會接觸毛孩不能吃的食物，如朱古力。
4：接觸時家長和主人都會在旁看顧，因為主人是最了解寵物的行為和情緒，當有突發事情亦能立即處理。
5：家長應留意小孩是否對寵物過敏。