【親子教養】發脾氣誰還會聽話去罰站 冷靜角真正用法|程衞強

撰文:程衞強
出版:更新:

冷靜角是一個冷靜的地方,並非一個懲罰工具。
有不少家長朋友都用錯冷靜角,當小朋友發脾氣時,就「罰」去冷靜角,特別是幼兒!已經在發脾氣階段,幼兒還會聽你吩咐去冷靜角站3三分鐘嗎?

冷靜角就像廁所一般,是一個「中性」的地方,有需要就要去。當初次「介紹」這個地方時,應該挑選小朋友心平氣靜的時候,慢慢說明「好唔開心就可以去呢度冷靜一下」,而且要練習的。不要期望練習完,小朋友想發脾氣就會自動自覺走去冷靜角,大人都未必做到!

當小朋友真的想發(或已發)脾氣時,父母就可以一邊講出小朋友想要的事及心情,並希望小朋友可以冷靜和細聲講出想要甚麼(我明白啱啱你講咗佢想要啲咩!但發脾氣嘅特性,就係唔講道理嘛!),例如:「我知道小明而家好唔開心,好想食糖,你慢慢講俾爹哋聽你其實想點?」然後一邊帶/拖/抱/捉小朋友去冷靜角。

初次使用冷靜角時,以上對話及行為可以糾纏很久,你可以重覆使用,他不會記得你兩秒鐘前講過的說話。記得頭幾次使用時,你要有足夠時間去「溫柔地堅持」。

當小朋友冷靜下來(其實係可能喊到攰咗),就可以稱讚他能靜下來,然後多數十聲讓他平靜(或20或30, 隨你鍾意,習慣咗之後,你數10/20/30聲就可以冷靜。但留意,唔係平時你兇佢果隻「嗱!1、2、3收聲」),然後和小朋友商討一些方案,例如:「我都知你想食糖,但係你呢排咳喎,不如我留一粒最大嘅俾你,等你好返就請你食啦!你想要咩色㗎?或留返粒紅色糖俾你好唔好?(但係你好清楚佢係想要綠色的)」如果最後結束的句子是疑問句的話,可能會更有效果。但第一:不要問「好唔好」;第二:要視乎小朋友嘅語言能力。

作者簡介:註冊心理學家程衞強Victor Ching

兩子之父,現為大學客席講師,同時是專注力不足症(ADHD)患者,現身說法讀書不需要坐定定、分心也不一定一事無成!