【溫多娜手記】葉茂林千金回歸耀才　搞迪士尼哈囉喂「冧」員工

華資證券大行耀才證券﹙1428﹚向來「搞作多多」，除咗每年「例牌」包場請睇戲，去年新股熱潮，老闆葉茂林仲諗到免息借錢俾員工抽IPO，佢果句「贏就員工，輸就歸我！」溫多娜記到依家。

所謂「虎父無犬女」，葉茂林次女葉頴恩近日「回歸」耀才做咗主席助理，隨即在過去周日搞咗場迪士尼Halloween同樂日，讓全體逾300名員工提前感受下萬聖節氣氛。呢排港股「悶悶地」，去迪士尼Halloween攞啲「刺激」，士氣即時返晒嚟！

葉頴恩仲好識做咁話，公司一直視員工為企業最重要和最寶貴的核心資產，一定會再搞不同類型嘅活動激勵士氣，好以冬季燒烤聚會、聖誕節慶祝派對等等；又指「愛才、惜才、育才」係耀才一直嘅理念。嘩，員工聽到，唔收貨都唔得啦！