賭王呂志和對談錄　笑稱︰錢只是煩惱

港股大瀉，創三年半低位，不少投資者均「損手」收場，但對比賭王呂志和的帳面虧損，分分鐘只是小巫見大巫。以銀娛﹙0027﹚股價由2014年1月84.5元的高位，跌至昨日﹙1月20日﹚收市20.65元計，呂志和身家兩年內帳面縮水逾千億元。不過，現年86歲的呂志和出席其自傳《呂志和傳》發佈會時，笑言一切只是「數字遊戲」，更開腔大談對樓市、經濟及人生的看法。

身家大縮水會否感到「肉痛」?

港股勁瀉、博彩業不濟，作為銀娛及嘉華國際(0173)的大股東，呂志和身家大縮水，更從《福布斯》香港富豪榜第2位跌到第5位，不過，他稱：「（股價、身家排名）只係數字遊戲，帶唔走，睇依啲野只會令自己煩惱」，奉勸大家「唔好睇錢咁重要，只係煩惱」，又話「揾兩餐就夠，無理由揾煩惱」。

不過，話雖如此，在場不少人都同呂志和講，想要多些「煩惱」！

澳門博彩業何時見底?

銀娛股價曾高見84.5元，但因澳門博彩業不景，昨收市已跌至20.65元，問呂志和如何看澳門博彩業前景，他指「最好唔好講咁多」，因報導會令事情催化並無作用，希望「等佢（行業）自然平和發展」，目前大上大落，「大家都受苦」。

有記者指股東「等唔到咁耐」，呂志和就笑指公司「年年都有派息，點會等唔到？」

香港樓價跌，幾時入市買樓?

樓價近期回軟，但呂志和對香港樓市好有信心，叫「大家要睇定，若果跌10%，有能力就應該買，但炒賣就唔好。」

有香港石礦大王之稱的呂志和，於1955年開展其石礦業務，其後涉足房地產業務，創立嘉華國際，他提到，香港的樓「例牌」細，又稱早年上環、深水埗的唐樓就如劏房般細，承認「香港樓貴又狹窄」。不過，香港的建築費不便宜，「貴都無辦法」，因而「無理由要商人，用1萬元作建築成本，但以8000元賣出。」

全球經濟放緩，拖累心香港經濟?

呂志和強調，「香港是福地，經濟大上大落，唔關香港事，是國際性，唔係我地力量控制得到，但要在香港揾兩餐無問題。」

13歲做到86歲，幾時退休?

呂志和13歲起自行創業，由在市場售賣小食，到涉足建材、酒店及博彩業，工作了70多年，但仍未打算退下戰場。

呂志和指，自己工作多年、有經驗可以與同事分享，「每日一早係度（返公司）食早餐，同同事傾下計」，若果退休，就是「等日出、中午、夜晚，瞓覺，最後尾，最唔鍾意聽就係等死。」

為何「賊仔帽」不離身?

呂志和每逢亮相都會頭戴「賊仔帽」，可謂其「生招牌」，他昨日解釋，自己在40歲開始，頭髮變得疏落，「冷氣直接吹落黎，好易傷風感冒」，又透露自己曾經試過戴假髮，但因汗多放棄。最後，女兒買了帽子給他，但一開始戴的時候都有「怕醜」，又試過被朋友取笑，但多年後已成習慣。