【窮遊世界】90後女生2.3萬歐遊86日 出書做全職旅人

撰文:
最後更新日期:

香港人對歐洲或多或少有些憧憬,但想到高昂旅費或會卻步。一名90後女生就僅用2.3萬元,遊歷歐洲7個國家、33個城市,將86日旅程編寫成書,證明歐遊不是有錢人專利,也給自己信心踏上全職旅人之路。

「我會行好靚嘅精品小店,但我亦都會行好地道嘅市場,呢種旅行模式令我使費唔會太高。」2013年,90後女生Stella讀大學二年級時,趁暑假獨自環台,從此愛上旅遊,「最高峰時,一年12個月,有10個月都有出去旅行」。

讀大學時,Stella故意把課堂排在幾天內集中上,例如只有星期三至五要上課,其餘日子即出發去旅行。Stella當時去台灣、泰國,每次開支不出2千元,問Stella大學時期總共出走多少趟,她想了想,表示應該超過20次,實際次數多到自己都記不清。

2015年大學畢業,大部份同學馬上投身工作,Stella卻逆其道而行,「返工後人生唔會有一個咁長嘅假期,想好好利用最後一個長假期」。小時候常從電影、電視看到歐洲場景,Stella一直想去一次,畢業旅行目的地就此定下。

歐遊「唔使捱麵包」

讀到這裡,相信你已心生疑問:「錢從何來?」Stella笑稱:「有人話『你係咪每日捱麵包杯麵先可以咁平?』,又有人問『點可能用咁平方法去歐洲?係咪去嗰邊做啲唔道德嘅嘢?』」Stella解釋,當時也預備了5萬元旅費,最終僅花2萬3千元,包括機票費用和衣食住行所需,扣除機票,平均每天僅花216元, Stella說:「呢個價錢對好多人嚟講係好不可思議......原來我都用剩咗一半,都忍唔住讚自己。」她強調:「真係唔使捱麵包、食杯麵。」

看更多:
● 窮學生想歐遊? 必去5個平靚正城市
● 徒步旅行最緊要鞋和襪? 告訴你最實用5個貼士
● 作假期有罪? 旅遊網Klook總裁:加分的表現

眾多費用中,膳食最叫人覺得不可思議,86日僅花了3,000元,一日三餐平均每餐約11.6元,在香港連一份早餐也買不到,不捱麵包和杯麵,真的做到嗎?

「每一餐有菜有肉有主食甚至有甜品」,Stella說她常趁著下午6點後的特價時段,到超級市場購買數天的份量。歐洲地大脈博,不少國家都可自給自足或由鄰近地區入口食材,毋須倚賴高昂進口貨,「10蚊港紙可以買到一盒5塊細細地嘅豬扒或者10隻雞下脾,夠我食到幾日。」主食方面通常購買大包裝一公斤意粉,另外歐洲的菜、蘑菇、乳製品價格也相宜,因此一天下來洗費的確比在香港吃得還便宜。

反思「需要」定「想要」?

83日的旅程,為了減輕背包重量,Stella只帶了4套替換衣物,只帶防曬液,不帶化妝品。「返到香港我望住個背囊,原來我3個月所需嘅,只係呢個背囊咁多,點解我間房會有咁多我唔需要又唔想掉嘅嘢?而家買嘢前我會諗係需要定想要。」Stella回港後把衣櫃清理一次,由原來50多件衫,減至10多件,由以前常買衣服、飾物,到現在不戴飾物、有必要時才買衣服,「而家買衫可能係,我需要一件防水褸,咁我先買。」

Stella常趁著下午6點後的特價時段,到超級市場購買煮食材料,可節省不少。(Travel with Stella圖片)

出書後棄全職工作

與不少背包客一樣,Stella亦有設立自己的旅遊專頁,寫下自己的經歷。Stella平遊歐洲的經歷,去年獲出版社青睞邀請出書,更促使她放棄原來的全職工作,全身投入做旅人。

「歐洲返嚟之後嗰一年,再去咗幾次旅行,屋企人和長輩都會關心,『仲未搵到工呀?』,無論幾有自信嘅人,都會覺得有壓力」加上Stella一直認為,任何事都要先嘗試才知道是否適合自己,便決定做一份穩穩定定的文職工作。

慣了到處飛的人,初初安定下來覺得「朝九晚五」、毋須日曬雨淋的生活很舒適,但待久了又開始覺得悶,「不過無信心可以做全職旅人,因為結咗婚,要同老公一齊儲錢,對屋企負責。」

「唔好介意行錯路」

直至埋首苦幹多時的旅遊書今年6月出版,得到不少讀者支持,令Stella重新思考成為全職旅人的可能性。「會唔會有其他方法,令我收入相對穩定?我唔可以今個月搵一千蚊,下個月搵一萬、再下個月就搵兩萬咁。」左計右計,除了本來收贊助出trip、替公關公司發文,還想到可以投稿到媒體和帶團,收入大概與之前返全職差不多。而出了實體書後,有報章雜誌訪問,以往不明白Stella如何以旅行賺錢的家人亦漸漸接受她的工作,「佢哋終於明白原來我以前一路都係做緊呢啲嘢。」

接下要跳出自己的舒適圈,踏上全職旅人的路,可能會成功,或者會撞板失敗,但Stella說以做文職為例,雖然最終發現不適合自己,但始終不後悔。「而家啲人好驚行錯路,兜遠咗。但我覺得唔好介意行錯,好似去旅行有時會盪失路,但比起行條大直路可能睇到更多嘢、得著更多。」



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。