【中大名物】中大檸檬批是集體回憶 你未食過仲稱得上是中大人?

最後更新日期:

話說上個月才和一班老友返咗去中大,仲食咗Med can名物檸檬批,點知轉頭就見有新聞話出現食物中毒事件,好彩唔係好嚴重。不過最近天氣熱得過份,食物唔好好保存就真係好易變壞,這類食物都係新鮮即食最好。

過期大學生

曾經的大學生,80後老鬼,身老心不老,自問玩盡大學3年,勁爆回憶同美好經歷,足以講足30年。

記得重遊中大時,幾個老友都感慨良多,個個都覺得好食的小店愈來愈少,周街都係大型連鎖店,想搵啲特色嘢食都難。好彩中大檸檬批仲喺到,大家都仲有機會尋回集體回憶,不然返到中大,都唔知仲有乜嘢剩。

中大名物檸檬批,係中大人都識。(資料圖片)

中大人人識

講起這個來自中大李卓敏基本醫學樓地下的檸檬批,我估中大人應該無人會唔識佢,就連中大校長沈祖堯都是捧場客!原來這個檸檬批已有幾十年歷史,睇番啲報導,個檸檬批之所以咁好食,係因為每個批都要花時間和耐性去做,真係一種手工批。難怪連收銀阿姐都可以神氣地講,好多醫生都係食這個批大的,就足以見證這批絕不簡單。

中大校長沈祖堯都是檸檬批的捧場客。(資料圖片)

每日限量發售

要整這個檸檬批,最少要兩日才能完成一底。第一日先做餅底同餡,然後要放入雪櫃一個晚上等佢凝固,到第二日才可以打忌廉做批餅面。所以做得唔多,聽聞每日只做約500個批,售完即止。每逢下午茶時段,好多人會慕名而來,排晒長龍,為的就是一嘗檸檬批的魔力。記著這個檸檬批相當搶手,話就話在3pm開售,但通常唔夠兩個鐘就會賣晒,真係有買趁手,記得早些來排隊。再加上這個檸檬批售價極平,由早年的5元,賣到今時今日仲係9.5元就可以食到,問你點忍。

檸檬批只在下午3時後才推出,不要錯過時間啊!(中大校友事務處)

吃的不是批 是回憶

記得當年year 1,就聽過組爸媽煞有介事的講過,「讀中大冇食過檸檬批,會畢唔到業㗎!」當年年少無知,半信半疑,只好寧可信其有,相約幾個同學一齊去食檸檬批。記得第一次吃時,回憶不是很深,只是奇怪點解這款普普通通的批,都可屹立中大幾十年,仲要話是中大名物。直到畢業幾年後,有次回校聚舊,又到本部吃了個檸檬批,這時才發現,我所吃到的,其實不止是這個批,而是由這個批所勾起的種種回憶。

除了檸檬批外,其他小吃也十分味美,值得一試。(CUHK Channel網上擷圖)

這個檸檬批在外面吃不到,它,雖不是什麼人間極品,但卻有一份難以言喻的親切感。清簡的賣相,住家甜品feel,但只要是中大人就會有所共鳴。大家要吃的,就是它那質樸踏實,清甜中帶微酸,那份青澀的味道,代表著年輕,代表著回憶。一放入口,回憶就自動湧現,那時趕project、忙上莊、忙拍拖,種種回憶,就係咁番晒嚟。

Med can屬於價廉物美的小店,記得支持。(中大校友事務處)

今時今日,仲有幾多間小店,仲有幾多是人手慢慢製的手工甜品?食一個檸檬批,解開那魂牽夢縈的思念。就是這份味道,成了中大人的共同回憶。你呢?又有沒有那種味道,是你一直沒法忘懷?其他U的同學仔,你哋有冇馳名美食,都可牽起大家的共同回憶?不妨留言分享。

你都想成為開筆一份子,稿件可電郵至opener@hk01.com;文章純屬作者意見,不代表開罐立場。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。