各位元朗友，近排行出行入有無覺得心慌慌？有無發現有多對眼望著你，半夜路過心中也會寒一寒？近日元朗大會堂、元朗劇院及西鐵車廂內等地，均掛起一張大眼宣傳海報，日日夜夜望實你，究竟發生咩事？

最近搭車或者行過元朗，有冇感覺有一對眼「睇實你」？這幾款含一雙大眼的海報，其實是元朗藝術節的宣傳品。七彩漸變底色加上一對超大的黑白眼，加上如毛筆般的書法字，寫上「第二十四屆元朗藝術節」，離遠望就如一幅巨型長輩圖。（不過係一幅有對大眼嘅長輩圖）

有元朗友覺得「幅嘢搞到我唔想去個藝術節」，更有人覺得，八十年代初「亂拋垃圾人見人憎」海報上的那對眼，比2017年這對眼設計得更好。

咁究竟好地地，為何要加對眼落藝術節海報？答案在文章最尾揭曉，睇答案之前，不妨回味一下政府其他騎呢設計。

1.　香港品牌飛龍

大家記得那條飛龍嗎？其實條飛龍正名為「香港品牌」，標誌加上「亞洲國際都會」標語，在國際場合宣傳香港。

第一代飛龍在2001年推出，飛龍以「香港」兩字及「HK」組成，花上900萬元設計。

最初亦有不少網民認為第一代飛龍核突，但其實一切觀點均源自比較，2010年，當飛龍第二代出現，雖然「HK」兩字仍在，但「香港」兩字消失、飛龍眼睛變成一點白色，無神無氣，網民才發現「沒有最核突，只有更核突」點搞呀？

2.　香港回歸20周年圖案

今年正值回歸20周年，政府就設計一系列名為「HK20」的「創意圖像」，其中一個最令人印象深刻的，莫過於一個潑墨底色、上面寫有「HK20」字樣的設計。

不少網民質疑潑墨底色為網上免費素材，「免費嘢當原創」。

至於其他包括煙花、生日蛋糕、壽包及鴨仔設計，亦被網民所垢病，你又覺得靚唔靚？

3.　港幣十元（膠）紙幣

都係嗰句，一切都係源於比較。膠造的十蚊紙（下稱十蚊膠）設計唔係唔靚，但併埋去舊嗰張青蟹十蚊紙上，十蚊膠就立即被比下去。

當然，唔少人應該好喜愛青蟹嗰種英國風，有皇室徽號，睇落好型。

除設計外，十蚊紙的顏色演變也引起不少網民討論。過往10元紙幣為綠色、50元紙幣則為紫色。推出紫色10元紙幣及膠幣後，50元紙幣則變為綠色，好奇怪啊！

4.　銀色韓肉水渠蓋

講到近期核突設計，非新更換的格網形水渠蓋莫屬。

在渠蓋更換之初，不少網民都認為其設計猶如燒肉格網。

其實格網設計原意不錯，至少無咁易跌電話落渠，但最大問題係，渠蓋設計與街道格格不入。

去過日本的朋友就會知道，人家的渠蓋設計好太多，香港渠蓋拍馬也追不上，唉。

5.　各區特色雕塑

18區區議會自2007年起，撥款三億予各區作小型工程，不少區域則以撥款興建奇怪雕塑，較為出名的有深井大鵝，站在迴旋處中心，一隻未燒嘅鵝，用嚟宣傳一個食燒鵝嘅地方，我睇唔透。

其他區域亦有些俗氣雕塑，佐敦道附近設有一玉石外型雕塑、荃灣眾安街亦有三條柱，柱上有金元寶，代表該處是「荃灣珠寶金飾坊」。雕塑表達的信息有點赤裸，已經唔知應唔應該叫佢做藝術品。

介紹完五個最騎呢設計，你覺得那個最離譜？講返最開頭個元朗藝術節，宣傳品對眼，其實是代表「開眼界」啊！你而家係咪都開咗眼界呢！

翻查元朗藝術節統籌委員會文件，元朗藝術節的宣傳小組預算支出為39萬9千9百90元，這個金額換來如此宣傳品，抵唔抵就大家可以評估下。

元朗藝術節於11月18日至12月10日舉行，據宣傳物品介紹，藝術節活動包括音樂、舞蹈、粵劇、展覽及魔術等。當中更請來知名魔術師Louis Yan甄澤權作表演；亦有在元朗長大的時裝設計師鄧達智主持的設計工作坊。