有一種孤獨叫創業 90後甜品師哭訴：羨慕別人有同事分享扶持
「我嗰時嘅夢想係做個甜品師，係專做甜品嘅！」年僅23歲的陳希賢（Jody），大學畢業後開設甜品店，自製馬卡龍及蛋糕出售。
臉上稚氣未退，但已成老闆，談起一人公司的孤獨，Jody訪問時感觸落淚，「好羨慕你有同事！」
話雖如此，但能製作出客人欣賞的蛋糕，就算口中不斷說「好伏呀好伏呀！」臉上也仍掛著一絲笑容，向心中的夢想進發。
【點擊「全螢幕」觀看影片】
追夢、創業對大部份人來說，
是一種奢侈，
旁觀者總着眼於好處、利益、得著，
講起就羨慕，
然而，創業者所經歷的徬徨和付出，
為追夢而背負的犧牲和代價，
當事人有苦自己知。
一年前，
Jody剛大學畢業。
就讀政治及公共行政的他，
始終心繫甜品，
便決定開設小型甜品廠，
製作馬卡龍及蛋糕，
「如果搞衰咗，三年之後我26歲，
到時再出嚟做嘢，都唔係太遲啫！」
而選擇馬卡龍的原因就更簡單，
「嗰時個個都覺得整macaron好難嘅，
咁我就覺得，無可能嘅！
無嘢係做唔到嘅！」
自此便踏上馬卡龍餅師之路。
有人認為創業路是孤單的，
「one man band」單人創業更甚。
一人完成所有工作，
Jody坦言最初幻想創業路很美好，
「以為我可以每日都留喺個廚房度，
自己做自己嘢，好開心咁樣」，
但歌都有得唱，
「天氣不似預期」。
Jody漸漸發現，
「整完八個鐘餅，
你要出返office，繼續對住份excel」。
每一張賣出去的單，
也要重新寫獨立發票，
不禁令Jody直呼，
「嘩，不如攞咗我條命去啦！」
一人公司老闆十項全能
但創業又何指區區打發票？
「你要識marketing,你要識business；
你要識design，你要識customer service，
乜都要識。」
如果是合營公司還好，
一人公司就更一腳踢，
「中唔中伏呢？
基本上我每晚瞓覺都會覺得，
好伏呀好伏呀！」Jody搖頭。
除了實務上要孤單應付工作，
一人公司面對的，是孤單的工作環境。
Jody每日回到廠房後，
第一件事就是開電腦播歌，
打破寧靜，舒緩孤獨感。
「我真係連呼吸聲我自己都聽到，
成間公司最嘈嘅聲，
就係雪櫃嗰啲拱拱聲」。
一人上班、一人研發產品，
工作上的喜與悲，
只有自己最清楚，
旁人亦難以理解。
「可能有時灰嘅就係，
我講啲嘢，朋友未必真係咁明白到我……
你成功咗一啲嘢嘅時候，
你好想同人去分享，
但又好似無乜人可以同你繼續再討論落去；
你失敗咗喇，又無人同你一齊討論研究，
究竟今次點樣失敗呢？」
坐在攝影棚的Jody，
望見記者及在場拍攝的同事，
一時感觸落淚，
「其實我好羨慕你有同事㗎，
可以同你講下嘢，
同事呢個人真係一個好重要」。
大概能在打工時，
將同事變為朋友，
是每個打工仔最大的收穫，
就如Jody所說，
好同事會與你分享成功，
落寞時亦可和你分擔一肚不快。
不過Jody很快便破涕為笑，
認為自己正努力習慣孤獨，
成為甜品師是他的夢想，
希望做出色香味俱全的甜品。
曾有顧客向他說，
「嘩估唔到，我本來真係貪個樣靚我先買㗎咋，
嘩但原來係好食㗎喎！」
有人欣賞甜品的味道而非單單「打卡」，
是他最高興的事。
Jody的最終目標，
是希望建立一個即使他百年歸老，
也能延續下去的品牌。
另看：【平絕港島】筲箕灣麵包小店日做17小時 2.5菠蘿雞尾造福街坊
創業做老闆，
可能是埋藏在不少人心中的夢想，
Jody就寄語大家，
「有夢真係要想，
你想完之後就真係要去試、去醒，
醒嘅意思係唔係叫你唔好發你嘅夢，
而係你醒嗰刻，
你係點樣去實行返你頭先發嗰個夢！」
心裏還有夢想的你，
準備踏出第一步了嗎？