網上討論區「連登」嘅網民近日發起咗個「一人一個瞓到懵咗嘅Moment」嘅討論，原來瞓醒教係最容易發生6+1事嘅Moment。搭到過站呢啲基本喇，仲有人見過同學瞓到仆X，你有冇試過佢哋以下呢幾個經歷？
【1. 瞓到7點幾，以為就黎遲到】中學4點幾返到屋企瞓晏教，一醒望到個鐘已經7點幾8點，即刻以為就遲到，嚇到標汗！衝出廳發現成檯餸，先知原來唔係朝早7點，係夜晚7點呀…… 【2. 瞓醒以為要返學/返工, 點知係星期6】一定係太熱愛返工返學，所以連放假都唔記得喇！知道今日其實放假，唔知點解有種賺咗嘅感覺，好似多咗一日假咁。 【3. 瞓到仆X】有網民就話讀中學個時，見證有位女同學喺禮堂聽talk嗰時，瞓到仆咗落地下，從此成為全校笑柄！如果跌襯嗰個係小編，應該想即刻退學。 【4. 瞓到下一堂Lecture先醒】讀U上Lecture恰眼瞓，一醒發現身邊啲同學唔同哂。原來瞓到落堂都唔識醒，仲要第二科嘅人入嚟上堂先知。所以話讀大學一定要同朋友上堂，除咗一齊做project，仲要提你起身！ 【5. 瞓到巴士到總站】喺巴士瞓教簡直係玩命，因為隨時瞓到過哂龍。不過有時睡意來襲點忍得住呀，好彩嘅話有司機叫你起身，唔好彩嘅話就要打電話求救，諗起瞓醒周圍一個人都冇仲要黑媽媽，都咪話唔驚。 【6. 懵到連胸圍都唔記得帶】女網民話讀中學時有日出門口太趕，當時仲要係冬天，入面著少件都唔係好覺。行行下先發覺心口好空虛，原來唔記得著胸圍，全日都覺得好唔自在。 【7. 喺紅磡一嘢搭到去羅湖】東鐵線站與站之間比較長，比其他線少啲上上落落，所以一瞓著都難嘈得醒㗎。搭火車瞓過龍相比巴士都算方便，一係坐到回程，一係過對面搭返相反方向。 【8. 瞓醒發現send錯whatsapp去公司group】喺公司OT恰著，一醒就唔小心send咗個「我好掛住你呀老婆😘😘我愛你」去公司group。冇send錯公司壞話出嚟都算係咁喇。 【9. 唔小心同外國朋友講廣東話】網民同日本朋友喺屋企玩點知瞓著左，當日本朋友叫醒佢去沖涼，傻下傻下咁用廣東話同佢講：遲啲先沖喇～結果日本朋友以為佢講粗口鬧佢。 【10. 懵到搵唔到月台】呢個就要大家用少少想像力理解喇。有網民話有晚喺油塘上車去石硤尾，瞓醒已經去咗旺角。即刻衝落車轉車，但瞓到溫溫燉燉咁搵唔到啱嘅月台喎，唯有搭到去油麻地返轉頭。