小編斗膽估計，應該好少人讀中學嗰陣係未出過貓。有「連登」網民發起討論，一齊回味下當年有心思諗點出貓，但死都唔溫書嘅中學回憶。小編集合咗15個出貓方法，你以前試過邊幾樣？
【1. 擺本書喺地下直接抄】網民話試過默書嗰時，老師坐喺位讀課文，形成一個絕佳嘅出貓機會！不過呢位老師居然發現唔到地下咁多本書……睇嚟平時都係畀學生恰多。（《出貓特攻隊》劇照） 【2. 交換答案】有時出貓都要同同學合作，抄哂啲答案喺問題紙，然後同其他人交換，仲可以每人負責唔同部份添。所以話得朋友得天下，有個同你一齊出貓嘅朋友簡直係如有神助！（《出貓特攻隊》劇照） 【3. 將高分嘅試卷傳畀大半班人抄】有好嘢緊係要益大家喇！電視劇入面啲學霸永遠都係孤獨精，呢位學霸就醒喇，獨樂樂不如眾樂樂呀嘛。（《那些年我們一起追過的女孩》劇照） 【4. 用筆尖大力抄喺本默書簿】咁樣默書嗰時就可以跟住啲字印寫！不過呢個方法只限默書～而且前提係本默書簿喺你自己度，根據小編嘅經驗，呢個唔算係高明嘅出貓方法。（《出貓特攻隊》劇照） 【5. 將答案化為密碼寫上黑板】最開心就係隔離班早測驗過你嗰班，因為可以通水！有網民就試過將通水返嚟嘅MC答案變成code，例如ABCD變1234，然後寫上黑板。細細個已經咁有寫code天份，將來一定係個很有用嘅IT狗～（《內衣少女時代》劇照） 【6. 女仔限定】騙徙技巧真係層出不窮！女仔可以拎支藍筆寫哂落自己大脾，默書嗰就可以扯高少少條裙睇。仲有人發夢見過阿Sir叫啲女仔暮短裙去考DSE，去廁所可以偷睇攝入底褲嘅貓紙。咁都得？！(《學校2015》截圖） 【7. 連老師出埋一份】邊個話老師同學生一定係對立？有網民嘅中學校長規定學生一定要背《弟子規》，仲會喺lunch time巡樓突擊檢查，有Miss都知呢個校長難頂，就幫學生印定貓紙攝落水樽。（《朝5晚9》截圖） 【8. 光明正大咁抄書】自稱係毒撚網民話，直程將本書放喺枱面抄，點知老師連望都冇望過佢。睇嚟呢個網民毒到連老師都覺得佢唔會有膽做壞事。（《出貓特攻隊》劇照） 【9. 科長隻手遮天】以前好興每科都有個科長，如果個科長同大家企喺同一陣，咩功課呀、默書呀就易搞好多。有次默完書，老師叫科長交換同學嘅默書簿，科長直接派返畀同學自己改，想唔合格都難喇！（《那些年我們一起追過的女孩》劇照） 【10. 上小卒下載試題答案】唔知而家仲興唔興小卒論壇，小編嗰個年代就一定會上小卒download啲筆記同試題溫書。入面仲有試題庫，有唔同教科書嘅練習或者模擬測驗嘅答案download！如果咁啱老師拎咗嚟做測驗，咁就爽喇！（《奶酪陷阱》劇照） 【11. 無印筆袋收埋貓紙】以前返學一人一個無印筆袋，佢啲透明筆袋仲係出貓神器！先放貓紙入去，想睇嗰時就扮搵筆。不過呢個方法都幾高危，萬一你個老師好眼利就麻煩啦。（網上圖片） 【12. 抄答案落默書薄嘅紙】一定要搵同默書薄一模一樣嘅紙，先完成到呢個出貓大法！默書嗰時就放張紙放喺隔離嗰頁，直接抄啲答案落空嗰版，扮哂蟹咁做第二版！（《出貓特攻隊》劇照） 【13. 當TA冇到】以前中學最期待就係老師冇返，TA嚟代堂！如果嗰堂係默書，大家就會蠢蠢欲動要出貓……有網民話一早知TA會嚟代堂，小息將背默嘅課文抄喺白板，TA仲要完全唔發覺有問題，結果全班就望住白板抄哂成篇課文喇。（網上圖片） 【14. 突然企起身昅前面】突然好想睇前面同學嘅答案點算好？網民就話佢直接企咗起身！老師問佢乜事，就不慌不忙咁話：「我腳痹」。不過呢個行徑真係幾易穿煲，睇怕都係一向曳開嘅同學先敢做！（《出貓特攻隊》劇照） 【15. 高科技出貓】背默最容易出貓，舊年代可以用手機錄底課文，將耳機攝入冷衫，全程托頭就可以聽到篇課文喇，近幾年直程用埋AirPod添！（《回答吧1997》截圖）