黎曉陽再出新碟 自爆曾經好沮喪:覺得個結他一年比一年重

撰文:
最後更新日期:

歌手黎曉陽日前舉行《Some Things I Keep to Myself Some Things I Share》EP Launch Party,一眾圈中好友及前輩都有到場支持,包括:at17、C AllStar、鄧小巧、Nowhere Boys、黃靖等等,其中盧凱彤更大讚:「我都幾仰慕你嘅!真心覺得你結他fingering彈得非常之好!」獲前輩大讚就連現場fans都戥黎曉陽開心,不過黎曉陽則笑言:「咁樣先最怕呀!」

一眾圈中前輩好友都有出席支持黎曉陽。(黃國立攝)

黎曉陽在EP Launch Party上除了唱出多首新歌,如:《自由泳》、《怕》、《Mr. Weather Man》、《I Will Be Alright》外,亦有《天行者》、《永遠很近》、《Cope With Life》、《香港傑出廢青》等等樂迷耳熟能詳的歌曲,滿足一眾新舊fasn的口味。除了請到at17上台,監製謝國維都有負責唱和音,又有黃淑蔓上台一同唱出Ed Sheeran的《Photograph》,兩把清新靚聲合唱令全場樂迷大飽耳福。主持Collin笑指黎曉陽不懂面對女生,難怪黎曉陽在台上會一臉靦腆。

黎曉陽與黃淑蔓合唱《Photograph》時一臉靦腆。(黃浩晉攝)

當晚音樂會台上台下玩得盡興,到表演《自由泳》一曲時,因為編曲上採用不同的敲擊樂器,為原汁原味呈現予樂迷,連結他手都要放下結他幫忙,而鼓手更變成「三頭六臂」,玩完鋼片琴要轉用沙槌,再轉打非洲鼓忙得不可開交。雖然要極速轉位,但樂手們一樣樂在其中,相信在場樂迷都能感受到音樂人的熱誠及專業。而且近期愛上畫畫的黎曉陽在演唱會上拍賣3幅作品,將收益捐至香港護鯊會。

黎曉陽將作品拍賣收益捐至香港護鯊會。(黃國立攝)

要迅速轉換不同樂器,樂手們忙得不可開交,但同樣樂在其中。(黃浩晉攝)

整個音樂會以一首相當過癮的《My England ain't No Good》作結,台上台下大合唱,就連結他手都唱埋一份,令眾人享受一個充滿笑聲的晚上。騷後黎曉陽接受訪問,被問到是否因為生活上有所感觸所以寫下《自由泳》一曲?他表示:「喺香港生活其實好困擾,好多嘢好似set定晒路線咁,畢業之後就要做嘢,之後就要買樓、結婚,跟住就死咁。但係我哋個MV就係有唔同國籍嘅人,佢哋都活出自己嘅人生,點解喺香港生活就要咁多框框呢?其實仲有好多lifestyle嘅可能性!」

另外,問到會否創作更多《Cope With Life》這類簡直白卻引人反思的作品?黎曉陽話:「都會呀!雖然呢首係我第一首寫嘅歌,以為好似好簡單,但係發現原來好多人都好鍾意呢種咁簡單嘅歌,尤其係年紀大過我嘅人好鍾意。」

整個音樂會以一首相當過癮的《My England ain't No Good》作結。(黃國立攝)

新EP題材講及成長、人生的想法,是否這段時間有所感觸?黎曉陽話:「有一段時間試過質疑自己會唔會再寫唔到歌呢?會唔會已經用盡自己嘅能力呢?但係慢慢就踏過咗呢個階段,因為我發現身邊好多人對我好好,好似霎時感恩咁,可能係因為年紀開始大,發現其實自己咩都有。」他又提到一段時間試過很沮喪:「試過覺得個結他一年比一年重,試過覺得好無聊;但發現自己其實好幸福,父母仲喺到,做緊自己想做嘅嘢!仲有身邊好多人支持,真係好多謝佢哋!同埋以前太多比較,依家學識去處理。」

最後問到被俾盧凱彤大讚彈得好,黎曉陽彈木結他有何心得?黎曉陽話:「其實都係以前busking累積經驗,其實我唔係好技術性嘅人嚟嘅,Chord Vocing都係隨心,其實我有好多嘢要進步,但我會上網逐格逐格睇John Mayer隻手右手點樣做,去慢慢學。」

連盧凱彤都讚,大家下次睇黎曉陽玩Live可以留意多啲佢右手喇!(黃浩晉攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。