at17開騷二人互窒有「火藥味」　二汶：你好貴㗎嘛，攞咗獎嗰啲！

at17昨晚於伊館舉行《Girls Girls Girls》演唱會，各位樂迷期待已久，終於見到盧凱彤與林二汶再次同台演出。畢竟at17的歌曲盛載很多人的青春回憶，她們的歌曲也必須要盧、林二人一齊唱才有完整的感覺，缺一不可。以往有一些講法指盧凱彤與林二汶傳不和才分開發展，不過當大家見到她們在台上的默契，帶着昔日的感覺唱出各首作品，這些傳聞即不攻自破。盧凱彤與林二汶多年沒同台，但感情同樣要好，一切都能從她們「互窒」看到。

唱過《三分鐘後》、《我愛班房》、《Never Been Kissed》等作品後，台上只剩盧、林二人，亦由full band變成只得她們的acoustic set，Ellen彈結他、二汶打木箱鼓。Ellen話：「每次嚟到呢度，都會諗起at17仲係叫Lam & Loo嘅日子」，二汶立即沒好氣話：「唉，呢啲嘢你何必自己提番呢？過去咪由佢過去囉！」

二汶放笑彈話：「冇咗盧凱彤喺我身邊最鍾意嘅事就係，我着嘅衫係加大碼都冇所謂，大家明唔明喺你側邊，有一個人着加細碼，而你着加大碼個感覺係咩呀？係灰呀！」不過搞笑過後，二汶又感性話：「不過喺你離開之後我憎嘅就係，我唔慣冇你喺我身邊啦，啲結他唔係你彈啦，不過我唔係憎其他人彈呀……」明明好感性都突然變笑位，事關Ellen補一句話：「其實係數得出邊個樂手幫佢彈過結他㗎！」

講完一輪，二人爭拗solo發展時為何不用MMO，為何二汶沒有邀請Ellen幫忙改編歌曲，此時二汶爆一句：「你好貴㗎嘛，攞咗獎嗰啲！你係金曲獎編曲人喎，我係邊個啫，都冇錢請！」二汶突然爆seed隨即令全哭笑不得，歡呼聲四起，似乎Ellen與二汶也有做棟篤笑潛質。

當然以上「心底說話」都是為搞氣氛，二汶最後講一句：「其實我最唔鍾意就係你唔喺我身邊。」大家即刻明咩事啦，at17嘅歌真係要佢哋兩個一齊唱先啱數㗎。

除了大放笑彈外，整個演唱會氣氛非常好，幾乎所有觀眾都企足全場，話晒ar17的作品律動感很重，節奏明快，令人聽着聽着不自覺得隨拍子擺動身體，浸沒在音樂之中。《囂張》、《Do You Love Me》、《青春》、《你有自己一套》、《The Best Is Yet To Come》等歌曲都一應俱全，沒有令樂迷失望。

最後演唱會以《Over The Rainbow》作結，即使場館多次廣播呼籲觀眾久久也沒有散去，不斷嗌Encore，不斷跺地，擾攘近十五分鐘；最後Ellen二汶見群情洶湧，只好再次出場「氹」大家離開。