Supper Moment新碟《dal segno》夠破格 錄起開心過中六合彩? 

撰文:
最後更新日期:

Supper Moment日前舉行新專輯《dal segno》試聽會,席上播出新歌《258km/h》、《橙海》及《全世界暫停》及《不要死在崇拜裡》。Supper Moment早前已透露,專輯《dal segno》以「現場感」為重心,當中收錄的9首歌亦會是他們日後11站內地巡演的rundown。

Supper Moment新專輯命名為《dal segno》,dal segno是樂譜上的連續記號,Sunny解釋當中的寓意:「Supper Moment就好似一首歌咁,前10年就行咗Verse 1同Chorus 1,到依家見到dal segno標記,就返去Verse 2再行過。」由於「dal segno」有點難讀,阿達笑言由開會之初眾人已取其諧音稱作「大山油」。

Supper Moment日前舉行新專輯《dal segno》試聽會,並分享創作新歌的靈感和趣事。(梁碧玲攝)

《dal segno》的製作班底亦是Supper Moment的一大突破,由Adrian Chan及王雙駿兩位監製聯手操刀,以及邀到4位Mixing Egineer:Frankie Hung、Simon Li、Mattew Sim以及經常合作的Adrian Chan。邀請不同Mixing Egineer合作,是為了營造不同「味道」,阿雞表示:「我哋以往用開嘅都係亞洲嘅mixing,偏向日本嘅mixing,著重人聲同高音樂器嘅部份;但係有啲歌我哋就想有英、美mixing嘅味道,著重鼓同Bass。而Matthew真係一mix就有嗰陣『除』,就好似Coldplay、Imagine Dragons嗰陣『徐』。」除此之外,他們提到新專輯加入更多樂器,亦用上很多Sampling營造聲效。

Supper Moment新專輯《dal segno》。(黃浩晉攝)

Supper Moment接受訪問時,分享了錄製4首新歌時的靈感與趣事,阿雞更形容當時「超級地又好玩又痛苦」,想了解歌曲背後故事嘅讀者記得睇埋落去。

《258 km/h》

「258」這個數字是取自高鐵的行駛速度,Sunny憶述當時乘坐高鐵到內地巡演,沿途只見到煙囪、發展,卻不見藍天白雲,所以用環保作主題創作歌曲。

編曲方面,感覺比較重型,加入breakdown段落之餘;結他亦是首次用上Drop C tunning,以及營造不同聲效。CK形容:「嗰啲聲效唔會好鋪張,但係如果冇咗呢啲聲,首歌就會變咗好普通Rock底嘅聲。」不過阿雞卻笑言,其實每首歌都係超級難題,所以每次一有靈感,諗到應該彈啲咩就好似「中六合彩」一樣。

阿雞笑言每首新歌的編曲都是超級難題,每次諗到彈咩都好似中咗六合彩咁。(梁碧玲攝)

《不要死在崇拜裡

相信各位樂迷早前都在不同平台聽過,此曲可算是顛覆性的作品。一來編曲變成暗黑風格;二來用上較少和弦,拍子上的變化亦較多。難怪阿雞話:「今隻碟啲歌如果用心數都幾『摎攪』。」不過他們表示,只要順住旋律的走向,沒有想像中困。阿達亦笑言:「有時同啲朋友傾開,寫Math Rock或者轉拍子嘅歌,寫嗰個係唔覺難,只係想執返出嚟嘅人覺得難。」

雖然歌曲拍子不停轉換,不過阿達笑言彈嗰個唔難,要執返出嚟玩嘅人先會覺得難。(梁碧玲攝)

《全世界暫停》

Sunny透露此曲寫於紅線音樂創辦人Gary Chan陳至仁先生離世的時間,當時只想周遭事物暫停,好讓自己感受身邊的一切。他又表示歌曲帶點Post-Rock的味道,有一段很長的music break,感覺將自己抽離到另一個空間。

編曲方面,木結他部份用拍打的方法彈奏,製造一個縈繞不散的聲效。在漫長的music break當中,CK形容阿雞利用結他造出一個「海豚叫」的聲效,他說:「感覺好似全世界停晒,你望住海面,有條海豚跳出嚟同你溝通一樣。」

Sunny形容《全世界暫停》是一首意境為主的歌曲,當中漫長的music break感覺將自己抽離到另一空間。(梁碧玲攝)

《橙海》

Sunny形容創作這首歌時有很多magic發生,靈感來自一次泰國旅行,夕陽映照海面,頓時覺得人類的確很渺少;但往往網絡卻令人自我膨脹,變得只顧自己,忽略了身邊事物。

編曲方面,歌曲感覺較chill,亦包含了一些Urban的元素,亦加入電子鼓聲效貫穿大半首歌。部份結他樂句由於作曲時保留至今,沒有很複雜的堆砌。CK亦表示:「Rhythm Session方面,我同阿達係做最簡單嘅,錄音嗰陣已經傾好,佢踩一下我先彈一下,保留最多空間俾呢首歌。」

CK透露《橙海》錄音時,與阿達傾好在rhythm session用最簡單的方法彈奏,為歌曲保留空間。(梁碧玲攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。