【RoadtoUltra2018】DJ King首次登上Ultra舞台:呢個只係里程碑

撰文:
最後更新日期:

阿King(吳崇銘)自C AllStar獨立發展後,全力攻向電音市場。由組合年代已開始鑽研電子音樂的他,今年終於一嚐所願,初次登上有「全球第一電音節」之稱的《Road to Ultra》的舞台,化身DJ King在台上打碟。接受《香港01》訪問時,問起他今次演出是否算是圓夢,阿King表示:「Ultra係其中一個里程碑,喺我心目中,仲有好多事要完成。因為我都係一位香港歌手,其實都想幫香港樂壇做啲嘢,將EDM融入廣東歌就係我夢想。雖然電子音樂係面向世界,但我都唔會放棄香港。」

今日阿King出席《Road to Ultra:Hong Kong》,化身DJ King在台上打碟。 (黃國立攝)

今年《Road to Ultra: Hong Kong》移師到亞博舉行,有別於以往的戶外場地,阿King也對今次的改動感到滿意:「其實就好似去到一個超大型嘅Club咁,大家可以有嘢食有嘢飲,又有Beer Pong呢啲休憩設施,最重要係個氣氛好好,好多人聽住音樂跳舞。因為畢竟香港喺夏天做電音節係難嘅,始終戶外太熱,上年我台下做觀眾,真係熱到衫都濕晒。」

更多《Road to Ultra:Hong Kong》精采花絮,請放大圖片
+24
+23
+22

有別於以往在台下做觀眾,今年阿King在台上打碟,感覺又有何不同?他微笑道:「以往我都經常去參加呢類型嘅電音節,支持自己鐘意嘅百大DJ。而今年我可以同佢哋企喺同一個台上面,感受下到底平時佢哋喺上面打碟望住啲觀眾係咩感覺,係一件好開心嘅事。」提到自己最喜歡的DJ,阿King則表示想與Tiesto合作,更稱對方是一位始祖。

提到歌手身份方面,阿King承諾各位樂迷今年一定會出歌:「而家出歌一定係電子元素,唔會再出流行曲。新歌已經做緊,今年一定會有。」

阿King坦言,在香港做EDM有一定難度,最大問題是香港人還會否聽香港歌,而香港歌當中又會否選擇聽香港的EDM,所以阿King也有在叱咤903主持電音節目《聽𠵱啲Music》,以推廣香港EDM文化:「其實香港有好多人做緊電子音樂,有唔少人做咗歌之後,都會畀我擺喺電台播。我覺得幾好,起碼有我哋本土嘅電子音樂,香港嘅電音會比較輕身少少,同外國比較重型嘅又唔同,不過我亦都希望香港可以再多元化啲。」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。