【我不怕唱歌】《幕後玩家》靚聲巨肺 坤哥:唱得好smooth!

撰文:
最後更新日期:

邊個唱歌不單止坤哥讚,連王浩信和合作過《愛‧回家》的蔣家旻都話好聽。

《我不怕唱歌》第三集,今次請來一位《幕後玩家》的女藝員,同主角黃宗澤、蕭正楠、張繼聰都有對手戲;她19歲參選港姐,同期有陳茵媺、呂慧儀等;荷蘭出世,隻身來港參選,代表作是《愛.回家》,劇中雖然是配角,但當時被主角更搶鏡,唱歌對她來說不止是一技傍身,更是一個治癒過程,試過抑鬱、自閉,全靠音樂令她康復。

唱《if i ain't got you》和《月半小夜曲》,兩首歌難度相當高。

阮兒為唱歌下過不少苦功,唱歌更令她心境有變化。(梁碧玲攝)

她就是阮兒Chole,選擇唱Alicia Keys的〈If I ain't got you〉和容祖兒版〈月半小夜曲〉,兩首難度頗高的歌,阮兒能夠應付自如,全因下過不少苦功,她說:「我初時唔係太鍾意唱歌,因為我唔識,但做一個藝員,唔係成日有工開,除非你好紅,否則有時會好不安,有時會唔開心,好容易會情緒低落,音樂可以令你治癒,令妳心情放鬆,我跟咗老師學唱歌兩年,過程係非常辛苦,把聲會爛,會經過唔同階段,初時去開聲,好辛苦,成日要伸條脷出嚟,令你成身汗,有啲人會暈,甚至有人會嘔。」

阮兒(右一)每晚在《幕後玩家》都出現,想不到她是唱得之人。(網上截圖)

阮兒(左一)10年離開無綫加入了女子組合Lacee Lacey,成員周麗欣(右一),林詠淘(紅衫)及羅錦慧。

阮兒因為情緒低落而學唱歌,原因是2010至2012年期間遇到事業上一個挫折,她說:「06年選完港姐入無綫,由訓練班讀起,冇諗咁多,有得玩就得。由荷蘭返嚟,覺得大城市好過癮,之後做多幾年,當時會諗,點解啲機會又冇我份呢?身邊又有好多聲音叫我出去搵突破,其實當時應該係覺得自己得,但其實係未得嘅,如果從新揀過,我未必離開無綫。之後Join咗女子組合Lacee Lacey,我哋幾個女仔,好畀心機,為咗隻舞練一字馬,大家幫大家拉筋,結果我哋3個月內全部做到,但最後公司結業,我哋一隻碟都未出過就解散咗,嗰陣令我心情好低落,返咗荷蘭,好自閉又有少少抑鬱,成個星期唔出街,又唔係好食嘢,嗰陣只係不停彈琴。」

阮兒在《愛.回家》劇中飾演Pinky,同馬子仁(羅天宇飾)最後成為夫妻,每到有Pinky的集數,收視都不俗。(網上截圖)

2014年阮兒回到TVB,今次她比之前更用心做戲,她做演員從沒有想過要大紅大紫,只求有一個角色令觀眾記得,她說:「好渴求一個大家記得嘅角色,人哋喺條街記得妳個名,或者講得出妳個角色名,我諗每個演員都好想有呢個認同。」被認同的角色,那年阮兒終於等到,她經過5次casting,最後在《愛.回家》飾演Pinky一角,當時有不少網友留言稱讚,她說:「其實當時劇集出街,我係好驚,我驚俾人話『嘩!呢個邊個嚟㗎?咁核突嘅?』或者『呢個咩演員嚟㗎?唔識喎?』好驚有呢啲負面嘅批評,頭兩集我直頭唔敢睇,但之後收到好多message,初時家人唔係好支持,覺得我應該讀番書再搵份工做,但嗰次佢哋都好支持我,我亦記得有次出街,有人好開心指住我!Pinky呀,亦有小朋友走嚟話想同Pinky姐姐合照,我真係好開心。」

阮兒現忙拍新劇《同盟》,靜待下一個機會,除拍劇外,亦希望出到Hi-Fi碟。

《愛.回家》的Pinky是阮兒的一個事業高峰,但之後星途又回復平穩,阮兒沒有覺得氣餒,反而積極等機會,希望穩坐二綫,她說:「好多人都諗梗係越做越上啦,但其實呢個係team work,主角好辛苦㗎,日日06開工,第日30(翌日06)收工,其實好辛苦,你俾我做,我都未必ready,你俾我做2,3綫演員已經好好喇,因為有得畀你enjoy拍戲,我冇咩大志…哈哈,依家我係開心㗎,角色又唔係冇嘢講冇嘢做,所以等待都係一件好事。」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。