【速食電視.來稿】將Yahoo香港起死回生嘅最後一張皇牌?

撰文:
最後更新日期:

文:忻浚賢

Yahoo香港呢排推出新搞作「速食電視」,令呢個「集體回憶」級嘅老牌子再次喺網絡活躍起來。

Yahoo香港喺大家「集體回憶」裡面,必定穩守第一二三名。想當年,阿叔我仲讀緊中一,為咗玩可以買曼聯雲尼士杜萊嘅英超足球經理人大賽,同埋玩鬥用間尺度得準嘅Yahoo桌球,就咁樣開咗人生第一個Email Account。

輝煌於社交媒體仍未盛行的年代

社交媒體仲未盛行嘅年代,Yahoo香港簡直係世界級:一站式服務,上至天文,下至地理,仲有強勁搜尋器,要乜有乜一應俱全。當然對中學雞嘅我嚟講,講多無謂,打機最實際,上Asiadog、Crazyhill玩單機玩到悶,就去「百發百中」、「一Q清袋」開定局,撩中同入嚟隻揪隻;儲齊四個仲可以喺Yahoo香港麻雀開雀局,嚟個梅蘭竹菊三英戰呂布。

當年玩Yahoo桌球是用間尺鬥度得準。(Yahoo!桌球天王截圖)

以前並無「Facebook大神」,有嘢想問想知就唯有搵「Yahoo知識+」:認真問得,亂咁問亦得,解答到問題嘅user就好似七仔咁,廿四小時總有一個喺左右。而當年嘅李露媚,就好似漆黑中嘅螢火蟲一樣,咁鮮明,咁出眾:

會計一條「風流帳應該計入 credit 定 debit?」
樂器一條「青山隱隱水迢迢,秋盡江南草木凋。二十四橋明月夜,玉人何處教吹簫?」

簡直此情可待成追憶,只是當時已惘然!

「速食電視」是一場拯救行動?

好景不常。社交媒體喺香港興起,大家開始講社群,開始講互動,開始講建立自己嘅網絡身份,所以單賣一站式服務已經難以滿足網民嘅需求;加上競爭對手Google日益壯大,令Yahoo香港逐漸被邊緣化,連我最愛嘅Yahoo Games都無聲無色消失埋。

沉寂十年,仲諗住Yahoo香港將會隨年月而慢慢消失於網絡市場,但2016年台灣Yahoo TV旗下嘅十個直播節目,成功爭取到兩億次觀看次數,似乎為Yahoo香港打咗支強心針。今年六月, Yahoo香港自家影音直播互動平台「速食電視」,正式登陸香港市場,話要為觀眾提供「幾分鐘一集,一眼睇晒」嘅自家製節目。

「開綠燈」就是將斑馬線行人過路處,「改造」為街頭表演大舞台。(yahoo TV宣傳片截圖)

Yahoo香港由一開波提供一站式「入門級網站」服務,到而家嘗試轉型為新世代嘅Content Provider,同數以百計瘋狂介紹隱世景點美食、去街頭搲素人訪問拍即時反應,又或者好似阿叔我咁消費下「集體回憶」嘅新興網媒爭一日之長短,真係需要無比嘅勇氣同毅力。

而最近推出嘅兩個自家製節目,「開綠燈」最吸引到阿叔我注意:要做一個拓闊到觀眾想像嘅節目,喺香港呢個context並唔容易;而「開綠燈」做緊嘅,就係將平時熙來攘往嘅斑馬線行人過路處,「改造」為街頭表演大舞台。單係睇表演者點樣重新定義「明明綠燈轉眼變成紅燈」果三十秒,點樣用盡馬路空間、將每日匆忙過活嘅路人都融入表演之中,呢五分鐘已經值回票價。

點都好,Yahoo香港呢個轉型成功與否,始終都係未知之數。但至少第一集「獨食男女」,就有世界級嘅苟姑娘,係晏晝陪我呢啲獨男,含情默默四目交投咁撐檯腳,簡直係網絡新體驗,嘩──正啊喂!又到Lunch時間,苟姑娘,我又來了!

有世界級嘅苟姑娘含情脈脈四目交投咁陪我撐檯腳,簡直係網絡新體驗。(Yahoo速食電視《獨食男女》截圖)

(本文為投稿,稿件可電郵至iwanttovoice@hk01.com;文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。