【贏在射精前.博評】岑應,係妳做衰個台格!

撰文:
最後更新日期:

就算你無睇《沒有起跑線?》,都會聽到好多人討論,鬧嗰個講「贏在射精前」嘅媽媽癲喪。無綫成功令到大家一齊邊睇邊鬧,第一集收視有成18點。

呢啲咁嘅譁眾取寵節目,喺電視台播就係問題,依家喺無綫度播,就更加大問題,講句盡啲,做衰個台格。

TVB節目中Irene一句「贏在射精前」,成為網民討論焦點。(節目擷圖)

為收視傷害一個家庭 千不該萬不該

《沒有起跑線?》嘅編導岑應,係呢一系列低品格「真人騷」嘅幕後重點人物。由《盛女愛作戰》、《求愛大作戰》到《沒女大翻身》都係由佢操刀,將社會當中受傷害嘅人搵出嚟,再喺螢光幕前,一步步將佢哋推向極限,極盡醜化之能事,將肚皮下嘅屎挖出嚟放喺觀眾眼前。到底呢個嚟自無綫新聞部《星期X檔案》嘅編導記者係咩嘢居心我唔知道,但如果要將一啲受社會折磨嘅受害者,變成觀眾眼中嘅恥笑謾罵對象,就係千不該萬不該真不該。

嗰位語出驚人嘅媽媽,大家依家都笑佢鬧佢,而其實佢都係呢個扭曲社會下嘅受害人。落喺無底線嘅製作人手上,一聽到佢講「贏在子宮內」、「贏在射精前」呢啲咁juicy嘅soundbite就一定會用,仲會放埋喺節目嘅宣傳片,上埋網,再由網民一直share,loop到天荒地老,對呢個家庭嘅影響有幾壞,根本預計唔到。

岑應主理節目幾乎每次都引起網民批評。(東星娛樂)

岑編導離開新聞部之後,唔知佢嘅道德底線畫咗喺幾高幾低。我信新聞部《檔案》會有人把關,但依家佢去到綜藝科就好似野馬脫韁咁。用吓腦都知道呢幾句說話一出街,呢位媽媽一定會畀人鬧畀人起底,但唔理佢照出。為咗推高個收視?何必呢?上幾輯嘅新移民、肥妹都有呢個問題,屢見不鮮,大家一齊笑佢哋,今次觀眾又係繼續鬧個媽媽……我話最要鬧嘅係製作團隊!

要怪要鬧的唔係受訪者 無綫理應孭返啲社會責任

有人會話,佢哋自願參加,佢哋都要負責任。請你諗清楚,一個喺社會受到折磨嘅人,佢有機會透過免費電視去發聲,本身真係一個好好嘅渠道,可以令到社會更加關心佢哋,令到呢啲社會問題更立體。喺長期無助嘅情況下遇到出路,好多人都會搏一舖。加上喺長期受折磨之下,呢班受害人嘅價值觀可能已經扭曲,對住鏡頭會理直氣壯咁去講啲唔合理嘅說話。但正正係呢班人,我哋應該去保護、諗辦法幫佢哋,而唔係取笑佢哋、拎佢哋嚟做節目去搶收視,更加唔係安排乜嘢「人生教練」、「45度角望人最有型」嘅所謂拯救者去繼續愚弄佢哋、愚弄觀眾。

又有人會話慘得過佢有收視。如果作為流行文化推手嘅電視台,只係為咗收視就批准呢一啲低品格嘅節目出街,就係呢個電視台嘅把關問題。電視台,除咗娛樂觀眾,仲要教育觀眾,而唔係將人性醜惡純粹地揭露、唔去分析唔去糾正而去無限誇大醜化。無綫自詡為華語電視台當中嘅領先企業,又係香港收視最高、節目遍及全球華語人士嘅免費電視廣播機構,就要好好孭返啲社會責任。

據了解,岑編導一年磨一劍,每年只係出一個節目。我當然唔知道大台物盡其用嘅方針底下,點解會容許一個編導成年只係拍一個節目,而且仲要係低質素、低品格嘅節目。以我有限智慧加上希望人人都係好人嘅方向去諗,唯一合理原因,就係高層希望有人去做呢啲污糟嘢,而其他編導唔肯委屈自己去做啲咁嘅「真人騷」,咁岑編導就繼續有佢嘅價值。

去年岑應主理的節目《網絡挑機》找來一批網絡紅人到大台做節目。

真人騷一定要低品味先好睇咩?

再繼續好人啲咁諗,可能岑編導都係搵餐飯食。上年佢主理嘅《網絡挑機》可以話係正常返啲,搵啲網絡紅人嚟做節目,可惜對於班師奶觀眾嚟講,呢班喺網絡個個有名有姓嘅紅人都係nobody,唔想睇,收視低,或者係因為咁樣所以今年岑編導要重施故技。如果真係咁,呢啖飯就係臭飯,我食唔落,希望大家都食唔落。

慳啲啦HONEY宣傳圖(ViuTV Facebook圖)

要做真人騷,可以唔駛咁低品格。睇吓ViuTV播緊嘅《慳啲啦Honey》咁,一樣係真人騷,一樣係玩男女大不同、兩性矛盾,唔低品格一樣好睇。一味只係誇大人性醜陋嘅節目,只要有啲人生經驗嘅電視製作人員都可以做到,但絕對唔應該做。

我知大把人會繼續邊鬧邊睇,而大台都好醒目,將呢個節目控制喺5集一星期內播完,到大家揸定主意唔睇,其實都已經睇咗一半。希望大家記得呢件事,下次唔好再睇,用收視懲罰佢哋。最後我想講句:

無綫、岑編導,收手吧啦。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。