關愛座最失敗嘅，係冇講明遊戲規則
到底冇人坐嗰時坐唔坐得？冇講明，應該係得，但可能會畀人鬧。點解有人鬧？就因為你又冇話可以坐。有人嚟係咪要讓？又好似要，但唔讓又點？咩人嚟先要讓？老人家嘅好似應該要，咁但幾老先要？真自願，又使乜劃定幾個位？
我支持取消關愛座（包括「優先座」，下同），真係唔好煩了。關愛座嘅嘢，其實好似畀貼士咁。最好你有規定，至少都大約有個指引。一係就直頭唔收。靠人「自願」，就大把爭拗了。貼士都還好，至少侍應未必敢公然拍片上網鬧個客（因為老闆會鬧）。關愛座靠自願，就日日有得嘈。
我長期認為香港人缺乏公德心，夠晒醜陋。但又要講句公道話，本城人多資源少，正所謂你有壓力我有壓力，人人都特別狂躁，可以理解。我在港島返工，試過放工時間（最好仲要係夏天）在金鐘站轉車過海嘅你，等十班車都上唔到，好難唔神經緊張。一有少少身體碰撞，或有人講多兩句望多兩眼，就演變成互鬧甚至全武行，仲有最新款嘅拍片上網互相批鬥。
但關愛座嘅爭議，就似乎遠超於「香港人好狂躁小題大做」或者「冇資源樣樣都要爭」咁簡單。證據？唔止香港有爭議，連出晒名（相對地）好修養有禮貌嘅台灣一樣拗足幾年，仲要兩邊陣營都旗鼓相當。最新花款係燒到去日本，對，嗰個出晒有公德心嘅日本。仲要係北海道，唔係迫爆嘅東京地鐵。
故事好簡單，巴士似乎唔係好滿，有位女子坐關愛座，另外一個少年勸佢唔好，結果被打。暫時未知晒來龍去脈，唔想急住做法官。但你問我，只講道理上，既然巴士唔滿，做乜唔可以坐關愛座？少年就真係多多事實了。咁但當然，多多事實，又唔等於女子應該打人嘅。
關愛座去到日本都要打交，又要鬧到兩邊都各有理據爭持不下。咁就話到畀你知，而家呢套關愛座嘅制度，應該檢討下了。
而家呢套關愛座嘅安排，最核心嘅精神就係「自願」，「最好你就讓但唔讓都吹唔脹嘅」，呢個亦係最失敗嘅地方。將個波拋畀坐嗰個嘅良心，但把尺人人唔同。就係因為冇講清楚。咁到底冇人坐嗰時坐唔坐得？冇講明，應該係得，但可能會畀人鬧。點解有人鬧？就因為你又冇話可以坐。有人嚟係咪要讓？又好似要，但唔讓又點？咩人嚟先要讓？老人家嘅好似應該要，咁但幾老先要？真自願，又使乜劃定幾個位？
台灣話搞博愛座，「人人可坐」，「也許他有需要，只是你看不到」，好似好多人讚。但一樣解決唔到問題。其實而家香港一樣係人人可坐，但就係有人會鬧。強調返「人人可坐」最多算係回應咗被鬧嘅人（多數係少年人），但鬧人嘅，其實照計都知道係「人人可坐」——「你係可以坐但你唔應該坐咯」。可以唔可以係規則問題，易搞。但去到「應唔應該」，邊有得拗。
有個咁嘅位，就自然有人要玩審判。最好，就搞得清清楚楚。一係規定某啲人坐得某啲人唔坐得，講到明。好似唔畀食嘢咁，犯嘅就罰，唔罰嘅都會有人話，拍到片上網應該都冇咁多爭拗，始終有法可依。好似女性專用車廂咁，合唔合理需唔需要另一回事，但整咗出嚟之後，唔會好大爭議，斷估你係男人都唔敢企過去，畀人鬧你你都好難反駁。而男人定女人，應該都比較易分。
但關愛座唔係咁嘛，地鐵唔會做醜人去「規定」你要讓座。況且執行上亦好多問題。我就當你規定呢啲位要畀「有需要人士」坐，咁點去界定？當拎長者卡嘅可以拎個襟章咁，或者孕婦都可以。咁但，整親腳嗰個呢？地鐵點界定你有幾傷？傷完幾耐要交返出嚟？以香港人咁有創意，你估冇人會拎埋柺杖扮整親？或者有冇人炒呢啲章五蚊一個（香港人最叻）？仲有大肚呢？使唔使出醫生紙？普通一個女仔去申請，斷估職員唔敢話「我見你個肚冇乜突喎」，咁又可能你會見到香港一夜之間多咗好多媽媽。
既然現行呢個「自願」制度又咁多爭議。強制執行仲複雜，只會更多爭議，不如取消關愛座算了。
有人會講道德淪亡呀，冇晒孝道呀，個社會好冷血呀之類。問題係，你點鬧都好，孝道冇咗就冇咗架啦。點解一個基於自願嘅制度搞到咁多爭拗？就係有班人想其他人自願，但其他人唔自願嘛。佢就係唔信傳統嗰種敬老，你可以如何？見一個打一個？
社會變咗，制度都要變。佢唔自願嘅，一係你大石壓死蟹，逼佢（但頭先講咗執行上好難），一係你就接受。點解而家啲人咁「自私」，好多原因，唔只係關愛座。全球化走到盡頭，經濟增長又似有還無，社會貧富懸殊，物價（特別係樓價）又貴，年青人向上流嘅機會細咗，呢啲都係全球現象。你見新一代不滿廢老不滿左膠，唔再信嗰套大愛包容弱勢社群，「我體諒你邊個體諒我」，英國投脫歐，特朗普上台，反精英，反權威，絶對有迹可尋。
取消關愛座係咪老人家就好慘？又未必。我坐車依然都見到有人讓座，亦唔係在關愛座。會讓座嘅人自然會讓。唔肯讓嘅，你拍佢片鬧佢都冇用。以前你可能係用社會壓力，「阿婆好慘呀你個衰仔牛高馬大都唔讓阿婆你冇好死呀」，但而家冇呢支歌仔啦，鬧返你轉頭添呀。Sad，但又可以點？
關愛座嘅「討論」，在網上鬧咗一大輪，誰也說服不了誰。拍埋片上網公審開埋聲鬧，都一樣有人會霸住關愛座唔讓的。你點去「證明」佢有冇需要？我睇唔到仲可去做啲乜可以扭轉呢種情況。既然係咁，取消算啦，至少可以減少殺錯良民，至少車廂清靜啲。
（文章純屬作者意見，不代表香港01立場。）