名創優品又涉侵權 本地漫畫界嬲嬲豬

撰文:
最後更新日期:

本地漫畫家江記喺 Facebook 上載咗一張相,指得到友人通知,名創優品推出一款疑似侵權縮骨遮。(江記 Facebook 截圖)

抄開有條癮,繼月頭涉嫌未經授權,抄襲本地插畫師 Darylhochi 設計嘅卡通熊仔「白白」賣電話殼賣斷市之後,中國知名「日本品牌」名創優品,又被指再次捲入另一單侵權疑雲。

上月頭,Darylhochi 在 Facebook 展示名創優品一款懷疑抄襲「白白」設計的電話殼。(Darylhochi Facebook 截圖)

本地漫畫家江記(江康泉)星期二喺 Facebook 上載咗一張相,指得到友人通知,名創優品推出一款與卡通企鵝「Duang Duang」crossover 嘅縮骨遮,「Duang Duang」中文名係一個謎,不過望真啲佢個樣,明眼人都會覺得同江記筆下嘅企鵝「丁丁」相似度高達 99.99%!唔通名創優品賣家品只係副業,實際上係專門幫卡通人物尋找失散兄弟嘅慈善機構?連續兩次侵權疑雲,惹來本地漫畫界不滿,呼籲杯葛,研究採取法律行動,其他插畫師都忍唔住出圖揶揄。

喂喂喂,但係點先算侵犯版權先?根據現行嘅版權條例,版權係一項自動賦予創作人嘅權利,完成創作之後,有關作品就立即得到版權條例保護。但係創意日日新鮮,好難訂立一刀切嘅標準,有冇侵權,通常都係交畀法庭決定。不過,之前名創優品香港區總經理黃樹豐接受《信報財經月刊》訪問時,就對抄襲表達自己一套定義:

除非一個 LV,一個 LA,顏色都是啡色、也是方形、也是手袋,那就是模仿。
名創優品香港區總經理 黃樹豐

嗱!雖然一個「丁丁」,一個「Duang Duang」,顏色都係黑白,「丁丁」都有出縮骨遮,但係……但係……設計有分別架!侵權?唔好問我啦,問返黃總……

一個「丁丁」,一個「Duang Duang」,顏色都係黑白,而原作「丁丁」都有出縮骨遮。(江記 Facebook 截圖)

連續兩次侵權疑雲,惹來本地漫畫界不滿,其他插畫師都忍唔住出圖揶揄。(Hello Wong Facebook 截圖)

名創優品自上年登陸香港,已經惹起熱議。明明 2013 年喺內地註冊開店,到 2014 年越洋去日本註冊商標,搖身一變成為「100% 日本品質」品牌。以 AEON 十二蚊店嘅價錢,賣 UNIQLO、無印良品嘅風格,一年半之間,全港已經開咗 35 間分店。背靠祖國嘅香港人,可能早已對山寨貨品見怪不怪,但大型「日本」品牌涉嫌如此明目張膽抄襲,堪稱世界奇觀。

 延伸行動: 
冒牌產品唔使花心血搞設計,左抄右抄就賣得,通常都比原作平一大截,對我呢啲想過中產生活嘅草根窮人,確係有莫大吸引力。不過,一邊幫襯冒牌貨,一邊唏噓本地創意已死,公平咩?香港人,爭氣啲!要本土!不要山寨!



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。