【01型活墟】周日好去處：80後IT港男轉型 橋底免費開talk棟篤笑
今個周末嚟喇喂！《香港01》將於2018年4月28-29日於觀塘海濱長廊VESSEL大搞社區墟市計劃，以主打「社區 x 生活 x減廢」的理念，設有不同類型攤檔、工作坊及表演節目。《01社區》頻道一直以來致力倡議各種社區生活價值，發掘並報導不少社區中有趣且與我們理念相同的素人故事。今次《01型活墟》，我們會帶佢哋嚟同大家見個面！
活動1：橋底棟篤笑
相信由上個月起到呢一刻，大家仲擔心緊搶唔搶到黃子華棟篤笑嘅門票。子華神講到明，「原則上」今次係收山之作。香港人真係好憂心，以後冇機會可以笑！
唔駛驚，《01社區》大把friend。香港有一班致力推廣棟篤笑的諧星組成「爆笑館」，今次我們邀請到香港喜劇演員陳樂添（Tim）在觀塘海濱公園橋底開talk講棟篤笑，最重要係免費㗎！免費㗎！擺明豪畀香港人，唯一條件係，大家要練定丹田，笑得大聲過吳君如！
話說阿Tim小時候本來係一位怕醜仔，9年前喺大學參加一個只有1人參賽的棟篤笑比賽，當然贏埋個冠軍。畢業之後，入咗史上被認定最悶、女仔聽到都掉頭走的行業---IT，後來認定人生方向要「笑」落去，轉型做自由工作者，發展棟篤笑的事業。今次呢個talk，佢會分享做打工仔變成自僱人士嘅一些有趣經歷，相信現場觀眾一定會好有共鳴！！！
日期：4月29日
時間：第1場 15:00 / 第2場 15:20 / 第3場 15:40
地點：觀塘海濱公園VESSEL 01
活動 2：社區漂書角
環保、共享一直是《01社區》倡議的價值，墟市當天《01社區》頻道活動之一將有漂書櫃，將會有各類型的書籍包括社區、香港歷史、文學、旅遊、煮食，仲有已絕版的雜誌、少量影碟㖭！當日有張靚靚的枱布，歡迎大家以各種坐姿嚟打書釘，坐度睇又得，瞓喺度、倒立睇書都得。講真，喺香港想揾個舒服嘅空間睇書真係唔容易。
漂書的方法有二：
一、以書易書，帶本書嚟同我哋交換。
二、如果冇帶書嚟點算好？當天我們會展示一些香港各地區的相片，只要你答得出係咩地方，咁就可以攞走心愛的書籍！
（*活動後大會會將剩餘的書籍捐獻給慈善機構，分享給有需要的人。）
日期：4 月29日
時間：13:00-17:00
地點：觀塘海濱公園VESSEL 01 （社區頻道空間）
墟市當天還有各類型的活動，攤檔，詳情請點撃以下連結：