【ABCT冠軍盃賽．邱益忠】Wow高效進攻成大熱 Entourage最強黑馬
ABCT業餘籃球冠軍盃4月5日舉行四強賽，搵筆者分析至啱啦！點解？一來過去幾年筆者研究至少300隊地下聯賽球隊；二來筆者成立嘅 #魅力移動SJC 係8強一份子，喺死亡之組同Wow X Teawood、西沙聯對戰過，深深體驗到佢地嘅戰鬥力，搵我分析應該最貼地啦！
先講返我哋魅力移動SJC （聖若瑟書院），雖然我哋爭少少入到4強，但成功做到傳承精神，一班80後師兄帶住兩位00後師弟楊筌皓同謝嘉浚挑戰列強。楊筌皓喺16強面對1.9米高嘅球員，依然以75%命中率射入8分；而謝嘉浚喺8強戰對決Wow X Teawood狂轟24分（包括6球三分波），證明自己入選港隊U18有根有據！
可惜，小弟因爲要準備求婚之旅而去咗澳洲，未能喺決賽日同大家現場講波，不過亦希望籍呢篇文同大家分析一下4強球隊戰力！
修頓ACTION－業餘籃球聯賽冠軍盃賽程
4強戰：
下午3時：Wow x Teawood VS Entourage
下午4時：時尚中國 VS 西沙聯
晚上6時：季軍戰
晚上7時30分：冠軍戰
Jumper Basketball將直播季軍戰及決賽
A組首名：Wow X Teawood （前稱Wow Fitness）
場均得分：65.2分
場均失分：49.5分
戰績：3勝1負
隊中主力：鄭卓男、余明峯、張嘉偉
奪冠機率：70%
短評：
中前鋒兼僅得22歲嘅鄭卓男，筆者睇好佢有力成為賽事MVP！身高1.91米嘅卓男手長腳長，封波意識極高，場均12.3分、10.3籃板、3.5球封阻恐怖數據，有佢落場對方要入波非常非常難！
「單打王」余明峯一向有「私league傳奇人物」之稱，筆者3年前開始留意呢位無打過甲一甲二嘅球員，單打技巧相當出色，多變嘅入波方式更嚇你一驚。目前佢上陣4場，場均12.25分、7.25籃板見佢只發揮七成水準。呢位一出場令女球迷「濕晒」嘅余明峯（我無呃大家，佢真係又靚仔又高又好波，我唔係Gay都要大讚）都有弱點，就係太中意花式傳波，導致錄得場均3球失誤。
前甲一安青球員張嘉偉快攻、三分樣樣精，其中一場以50%命中率射入21分係代表作！至於中大三子之一嘅魏俊銘、潘俊熹一起機就猛力狂射，而睇得又打得嘅模界男神陳偉成（Avis）＋天堂鳥成員葉灝基（Gordon）坐擁大批Fans，自然為敵隊造成極大壓力。
B組次名：Entourage
場均得分：56.7分
場均失分：47.75分
戰績：3勝1負
隊中主力：余普生、范永賢
奪冠機率：55%
短評：
除了不敵時尚中國外，其餘3場有兩場大勝對手雙位數，當中余普生本身係會計界巨頭PWC 3大男神之一，射術和核數一樣精湛，目前暫時以21.75分喺賽事得分王列第一位！至於范永賢外圍火力夠猛，除第3場面對時尚中國時中空彈外，其餘3場合轟11球三分波，場均18分排喺得分王第３位。
嘩！一隊有兩個超強得分手，難怪Entourage被譽為最強黑馬！呢班以ABC＋鬼仔為班底嘅球隊，身體質素同三分火力達A級水準，不過平均高度不及Wow X Teawood，要殺入決賽，必須要有第3位球員跳出！
（其實我駛唔駛寫返英文？算啦，你地去Google Translate應該OK！）
B組首名：時尚中國
場均得分：56.5分
場均失分：51.25分
戰績：4戰全勝
隊中主力：區年樂 、朱賢煒
奪冠機率：65%
短評：
區年樂最近頻頻上報，除咗因爲佢喺籃總盃表現出色外，主因係佢所效力之甲二球隊建龍有傳會簽入前NBA湖人中鋒Bynum，身為嘅佢以隊長身份回應傳媒而為人熟悉。從資格賽到8強，睇得出佢打呢個比賽絕對超班，4場比賽共攻入17.25分，無論係剷籃、中距離同三分都有貨交！
另一位隊友朱賢煒對決Abandoned時，以69%極高命中率轟入21分，為球隊帶來第二個得分點，即係話，你派人死Mark區年樂係無用嘅！至於第3個得分點非潘嘉駿莫屬，雖然佢三分波未起Q（兩場11射2中），但兩分尚算穩陣，所以時尚中國無論高度同速度並重，係賽事奪冠次熱！
A組次名：西沙聯
場均得分：60.2分
場均失分：57分
戰績：3勝1棄權 （實際上係4戰全勝）
隊中主力：劉振星、吳雋彥
奪冠機率：50%
短評：
西沙聯將於四強戰對陣時尚中國，其實呢次係兩隊四戰全勝嘅球隊大對決！只係因為西沙聯對魅力移動SJC時誤派甲一飛鷹球員余嘉寶上陣，而被判0:20落敗。西沙聯呢隊後生波打法極快速、射波準到爆，一味同你衝衝衝快搶攻，一般球隊未能招架！劉振星效力甲二晉裕，司職射手，雖然今次參賽數據上未有「爆Show」，但關鍵時候嘅三分波依然有保證。最重要佢又大隻又靚仔，女球迷唔好錯過啦！
由於賽制所限，現為甲一飛鷹球員的余家寶和李東坤未能為球隊披甲，西沙聯今次可算係半力上陣。佢哋要殺入決賽兼奪冠，必須人人有貨交同發揮120%戰力！
後記：
睇仔睇到好悶？放心，大會統計員Tiffany妹妹外貌清純可愛，仲有少少似TVB主播藍可盈！