【意甲轉會動態．博評】AC米蘭之爆買，真的能令球會一夕復興嗎？

文：洛迪高@世界波

今年重返歐戰（歐霸盃），即將出戰歐霸外圍賽嘅AC米蘭正式獲中國資金入股後，喺今夏轉會市場實行大展拳腳。有別於近幾年被球迷取笑為乞食式嘅各種轉會手腕（如先借後希望以較低價買入，甚或以免簽方式簽老將，半紅不黑嘅球星以及實力不足但又好似有啲希望嘅新星），今夏球會出手又快又狠，亦無出現因英超式溢價而花費過多，以4,200萬歐元（折合3.8億港元）吸納盛傳與祖雲達斯教頭艾歷尼（Massimiliano Allegri）不和嘅意大利國腳中堅邦路斯（Leonardo Bonucci）更係筆者認為係今夏暫時最震憾及Good Deal嘅轉會。

球會今夏投入巨大，相信下季殺入歐聯只係最低要求，相信球會定位都會係喺現今祖記獨大嘅意甲挑戰一下霸權，但只憑今夏收購（假設尚有新球員），又係咪咁易做到一夕就可以拉老婦人落馬？筆者睇怕就未必了。

 　前車之鑑

AC暫時加入嘅新球員幾乎可以湊夠一隊波，而且有當打（如邦路斯，梅沙基奧（Mateo Musacchio）及碧基亞（Lucas Biglia）），亦有受注目新星（查漢奴古（Hakan Çalhanoğlu）、卡斯爾（Franck Kessié）、干地（Andrea Conti）及安達施華（Andre Silva）），新兵組成結構看來合理，前提係呢班球員相信唔係僅作補充陣容之用，觀乎現今陣容，呢班新球員更大可能會即插即用，因此可見球會無論喺陣容同打法都會同之前有頗大分別。雖然話新兵們頗具質素，而且不少都經過主流聯賽考驗，但一切會否只係看起來很美？至少有利物浦及熱刺前車之鑑。

喺13-14球季開季前，熱刺係賣走皇牌球星巴爾（Gareth Bale）後，大手購入保連奴（Paulinho）、查迪利（Nacer Chadli）、蘇爾達度（Roberto Soldado）、拉美拿（Erik Lamela）、艾歷臣（Christian Eriksen）等球員，令球迷有過一番期待，可惜有好幾位球員只係踢過幾場好波，其中蘇爾達度更可算一次失敗收購，結果新兵無法有效提升球會成績，雖說如拉美拿及艾歷臣尚在陣中，但近兩年熱刺嘅好成績，功勞大部份都集中喺教頭普捷天奴（Mauricio Pochettino）身上。及後一季嘅利物浦似乎無好好吸取教訓，喺季前夏天轉會窗照樣瘋狂引入新球員，如林拔（Rickie Lambert）、拉蘭拿（Adam Lallana）、安利簡（Emre Can）、馬高域（Lazar Markovic）、洛夫雲（Dejan Lovren）、奧歷治（Fivock Origi）、從西維爾來投嘅艾拔圖摩蘭奴（Alberto Moreno）以及由馬體會租借加盟嘅文基路（Javi Manquillo），可惜下場同上季熱刺好相似，一眾新戰將有不少都叫做到主力，如洛夫雲及安利簡，但都無法好好提升球會戰績，好似摩蘭奴仲不時因差勁表演做戰犯。另外好似馬高域徹頭徹尾成為利記過客，貢獻缺缺。

猶幸AC好早已出手，一班球員可以利用夏訓磨合，但始終未有真正實戰，就要喺歐霸外圍賽打真軍，好彩對手唔強，可寓賽於操。不過今夏近季改弦易轍，傷筋動骨嘅調整陣痛期難免，陣痛期之長短，就睇球會主帥蒙迪拿（Vincenzo Montella）嘅功力！

 　蒙帥考牌戰

蒙迪拿執掌球會帥印黎偶有佳作，但始終未能複製當年初教紫百合費倫天拿嘅風彩，除咗因為球會規模壓力不同外，當時蒙迪拿於紫百合所表現嘅活力足球因AC陣容制約下自然難以複製，但今夏引入嘅新球員都頗年輕，蒙帥自然再無任何藉口。蒙帥執教履歷無硬淨戰績支持，尚可利用球會牌頭及名氣鎮住一眾年輕新兵，而經驗戰將如邦路斯因與祖記不和來投，碧基亞仰慕球會已久更曾因此與前球會拉素鬧番，相信亦唔會趁機做球霸，而會作更衣室大哥好好帶住年輕隊友，因此短期內飛機仔可集中精神於調整打法並塑造出個人風格及哲學，但考佢嘅係能否盡快磨合好球隊並有不俗戰績支持，如初期成績同上季無太大改善隨時早早落鑊，更遑論成績不佳而令球員人心思變或作反了（值得思考嘅係，究竟喺困境之時，蒙迪拿會點樣喺戰績及比賽場面中取捨？）。

 　巨星VS青訓

AC米蘭今夏收購嘅球員當中，真正可以算係球星級嘅，應該就係邦路斯，而佢都係因為同艾歷利不如而離開。如果AC米蘭真係想重返頂級豪門之列，就要真正引入頂級球星，不過呢個前提當然係AC米蘭嚟緊成績夠好，齋靠錢同現今蒙迪拿嘅履歷都未必咁容易！

另外一樣AC米蘭如果想重返意大利足球頂峰地位要再下苦功嘅地方，就一定係青訓！不過現時AC最出色嘅青訓產品，就係之前扭計離隊，但最後續約嘅門將當拿隆馬（Gianluigi Donnarumma），而另一青訓產品迪施基利奧（Mattia De Sciglio）就已經轉投祖雲達斯。要作為一個國家嘅代表球會，最好當然有青訓巨星，但似乎AC米蘭喺人數上於呢方面未見突出，而且來年似乎都唔會以青訓為主，AC喺呢方面仍然任重而道遠，呢個就要睇管理層嘅方向了，而短期內作出如買入干地等年輕才俊都可以算係權宜之法。

 　同場加映：AC米蘭來季陣容及打法預測

蒙迪拿執教生涯暫時較成功嘅時間相信喺執教費倫天拿時期，當時佢嘅主打陣式一係433，一係352（361,3511），其中一個最重要嘅位置係中場中，阿古蘭尼（Alberto Aquilani），大衛比沙路（David Pizzaro）及保查華利路（Borja Valero）等人發揮十分重要，現時加埋新兵幾位中場都可以顯示出戰術應會由中路開始，前鋒多拉扯空間幫中場造文章，而查漢奴古及卡斯爾等都可以自己搵食，正如保查華利路咁。

另外打三後衛都係一個選擇，除咗中路能攻能守且具運動能力外，兩邊閘位新兵列卡度洛迪古斯（Ricardo Rogriguez）及干地都攻守俱佳，相信可以勝任兩邊翼衛職位。

過把癮就死？定係重返巔峰嘅第一步？相信AC球迷都樂於活在當下，未來就等開季再講啦！

（文章純屬作者意見，不代表香港01立場。）