文：洛迪高@世界波

戰神伊巴謙莫域（Zlatan Ibrahimovic）早前宣佈重簽曼聯，繼續挑戰英超而非往美職中超掘金，着實令曼聯球迷興奮一輪，而有相關消息指佢能夠於11月康復，加上佢不時於社交網站貼上操練短片及霸氣字句，重有一啲網上流傳嘅霸氣語錄，都令除了忠實伊巴haters外，其他球迷都佩服佢嘅球技、強大嘅精神力及人格魅力。

筆者喺伊巴早年時曾相當討厭呢位球員，覺得佢自大及不可一世，但閱畢佢自傳，加上伊巴處事隨年齡增加漸加成熟，而且以實力證明到自己，筆者對佢都好感日增，同時認為好似伊巴呢種球員嘅存在，恰恰為日益標準化嘅球壇，注入更多個性及色彩，令足球更色彩繽紛。

喺足球世界，除咗球員外，唔少球隊似乎都更樂意破除近年於足球界中出現嘅無形框框。除咗流行咗好幾年嘅4231陣式，哥迪奧拿（Pep Guardiola）麾下巴塞隆拿展現嘅傳控，tiki taka加上前場壓迫稱霸，令唔少球隊都會效法，縱使最後出現嘅更多係東施效顰。當經過咗一段日子，巴塞不再無敵，有唔同球隊用自己方式擊敗巴塞後，對於tiki taka嘅迷信亦獲得破除。

然後大家見到嘅係3後衛復興。3後衛陣式唔止淨係用352，重有343甚至361，而干地（Antonio Conte）無論係執教球會定國家隊，都係用3後衛嘅表表者，令球壇有更多領隊願意用3後衛，而且展現出嚟嘅踢法都各有不同，令足球世界喺比賽場面上終於唔再標準化。

除咗球隊本身外，我哋都見到多類型嘅球員重新抬頭。就好似3後衛嘅翼衛咁，佢哋嘅攻守方面嘅才能不再受到限制，可以喺邊線自由主宰攻守，而無需好似4後衛陣式中嘅閘位球員咁受一定限制。

喺球場上嘅球隊及球員謝絕標準化、機器化外，好似伊巴咁嘅球員喺場外都為足球增添唔少talking point及樂趣，令足球擁有更多「球員魅力」。筆者記起喺伊巴自傳入面，佢形容效力巴塞時，發現恩尼斯達（Andrea Iniesta）、沙維（Xavi）等球員為哥迪奧拿踢波時十足「小學生」，佢呢句說話當然唔係貶低佢哋嘅能力，而係指佢哋服從性。由伊巴講出嚟可能有誇張成份，但不得不說嘅係早幾年無錯係有好多冒起球星或好波之人，但大部份都無咩霸氣，或者「球味」。

「球味」呢個詞語雖抽象，但如果由筆者去講，就係嗰種一拎波，你就覺得有嘢發生嘅球員，好似朗拿甸奴（Ronaldinho）、C朗拿度（Cristiano Ronaldo）及美斯（Lionel Messi）等等。呢樣嘢除咗係由球技決定外，個人魅力、自信心同大場面發揮都係重要構成因素，而由於前幾年球隊及球員標準能力化，已經唔係每個球員不可或缺，而就算佢能力幾高，喺現代足球面前都只係一個機器入面嘅齒輪……久而久之，成個足球界就會開始變得沉悶，當大家都踢同一個戰術用同一種球員時，無法子吸引更多球迷，甚至流失一班球迷亦係理所當然。

講過球壇近年標準化至開始「物極必反」，伊巴等性格球星嘅存在，正好能為球壇增加多樣性，留住一啲就係唔喜歡全部球隊球員都倒模一樣嘅球迷。不過呢類球員畀人感覺係自信抑或自大，都要睇本身球員實力，至於伊巴喇喎，當然無問題啦，所以先會有咁多球迷中意佢咁有自信同霸氣嘛！

（本文純屬作者意見，不代表香港01立場。）