煙霧瀰漫嘅垃圾桶，由四個肚腩微凸嘅男人獨佔，少數路過嘅行人都繞路而行。我停咗喺前少少嘅位置，靜候最後一枝香煙熄滅。食完煙就上的士嘅機會率，大概係 50：50，今次總算估中，當最後半枝煙被拋棄落地後，四個男人動身上車，前往東九龍四個地方。

因身型問題要前座嘅大隻佬交代完複雜嘅四站路線後，四人繼續未完嘅話題。

後座左邊嘅男人講：「你頭先嗰件得唔得？」

中間個後生啲嘅男人拍一拍手答：「掂呀，又後生又好傾，我哋搞掂仲傾咗陣先出嚟。」

好傾就麻煩喇，好易沉船架陳仔。

聽唔明乘客嘅對話都唔係第一次，愈講得含糊，愈想知究竟佢哋講緊咩。沉船？鐵達尼呀？

坐前座嘅大隻佬嘗試擰轉身回應，但唔係太成功：「陳仔小心呀，你後生真係好易沉。之前隔離隊個阿 Man，就係因為咁離婚。記住出嚟玩吓冇所謂，唔好沉船呀，沉船有後果冇結果㗎。」

連續兩盤冷水，並未將陳仔嘅興奮淋熄，相反地佢充滿自傲咁講：「得啦，我點會鍾意隻雞？真係估唔到俾錢嘅都有咁嘅質素。」

「俾錢都有咁嘅質素？就係俾錢先有咁嘅質素呀，出嚟玩多啲你就知你錯過咗啲咩。」後座其中一個男人答。

係呀，所以我哋點都預埋你出嚟就係咁解，有好嘢梗係益兄弟啦。出嚟玩又唔使負責任，大家明買明賣，好過去蘭桂坊溝女啦，又要付出感情，又有手尾跟。

然後由尖沙咀到九龍東，四個男人就眉飛色舞咁討論各自嘅戰況。作為男人，聽其他男人赤裸裸咁講點將獸性發洩喺女人身上，尷尬就不至於，只係覺得有啲可恥。就算係野花，都無使咁樣猛力攀折掛。聽住佢哋講「喺後面扯住啲頭髮嚟入」「某某個樣夠 cool，最鍾意問佢『係咪唔想要呀』，嗰種違和感正」「我就鍾意要佢跪低服侍我」「某某技術真係好好，不過有啲鬆」，連比帶劃嘅陳述，口水幾乎噴到成車都係，陳述時嗰種發自內心嘅趾高氣揚，相信係佢地人生中最有成就感嘅時刻。

好快，三個男人落咗車，得返陳仔喺車。又係噹一聲然後錄音：

老婆，我應酬完 Kevin 哥佢哋喇，就返到。

老婆？老婆？賤到咁都有嘅？唔怪得佢一再強調唔會沉船啦。聽完佢咁講，我頻頻喺倒後鏡望佢，希望記住佢個賤樣。喺唔知第幾眼嘅時候，四目交投了，我努力喺皮肉不動嘅情況下，傳遞我對佢嘅鄙視。如果係普通的士佬，可能已經口出惡言，但作為優質的士司機嘅指標，就算乘客幾賤都唔會有咩動作。

你唔好咁望住我啦，我都唔想。

咦，陳仔接收到我嘅鄙視喎！既然佢主動投案，咁我都唔使客氣：「吓？唔想？唔想結婚呀？」唔想結婚可能會照結，唔通唔想叫雞又會去叫咩。

梗係唔係啦，我好愛我老婆㗎，我都唔想去嗰啲地方㗎，做嘢無辦法啦。

做嘢？去嗰啲地方做嘢，你係試鐘員定臥底呀？「哦，做嘢，咁你做嘅行業都幾特別，唔怕啦，老婆唔知有咩所謂。」

我老婆知㗎，今時今日做嘢，唔打好人事關係點上位？咁啲兄弟話要去，唔通唔去咩，無得紮都事少，俾人兜就大鑊，反正入到房都係各自做，我唔搞咪得囉。兩公婆，講個信字啫。

陳仔一口氣急口令式講完，車都差唔多到目的地，唔知係咪有其他同事鄙視佢，呢段辯白講得流暢非常，應該係喺心中諗咗無數次但係又唔可以宣諸於口，直到今日，先第一次向我呢個陌生人講出嚟。

信唔信佢入到房但無動作？呢個問題盤旋咗喺我腦海好耐，明知無答案又禁不住不停諗，仲延伸去諗，為咗上位而採摘野花，或扮採摘野花，喺香港有幾普遍呢？

（文章純屬作者意見，不代表香港01立場。）