文：熊先生

香港教育實際想output咩end product呢？睇佢哋着重評審啲咩就知道。

學生係被要求：要死記、羣覽資訊然後以沒有創作空間的方式精煉成summary、忠實執行任務、學識不做異數不出位（香港教育制度何曾褒獎有機自然而然嘅不規劃而因此必定混亂多異嘅發展）。

而不被要求做的東西，同樣可怕：創作、自己做自己思想的領導（用自己腦力來思考出路）、對世界保有好奇、做一些不爲既定目的、純粹爲其本身以然的事情......

咁喺呢個制度之下，香港每一個本身三尖八角人人不同嘅細路仔，就要硬生生進入個雕塑工場。夾硬將他們天然的獨特性磨掉、拆開，最終要每一個原本岩岩巉巉嘅細路，變成容易控制容易管理的一個同質羣體──無異數的、去人性的。而呢種學生就係呢個教育制度要製造出嚟嘅"standardized／standard end product"。

咁你話呢啲，本來處於無壓力盡情自主探索階段嘅小朋友，點樣可能會唔係受緊巨大嘅痛苦。要記住，我哋大人感受唔到小朋友嘅感覺，並不代表他們不在受苦。呢一點要再三澄清，年紀小係唔會令任何一種痛苦變得更加易捱。唔好以爲係佢哋唔捱得所以嗌苦，其實係實情真係好難捱，真係好撚難捱。

自己諗下，細個嘅自己，點會曾經諗到要自殺。然後再諗下，要幾多怨恨、幾多厭倦、幾多哀愁先會迫到呢啲小朋友要提早行使掌控自己生命嘅能力，然後就結束呢場佢哋見唔到盡頭嘅困境。

你從旁觀看，好似只係看着一疊疊功課作業、一張張試卷成績表、一輪輪倒模考試分類篩選。但係呢一啲嘢，縫紉交疊起來，就確切成爲了我哋社會小主人的活地獄。

佢哋係真真確確承受着巨大嘅痛苦──呢啲自殺係真係哀嚎嚟。而我哋嘅不作爲，真的，同樣令我們成爲道德罪犯。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）