唔怕生壞命，最怕被改名。話說早前在荃灣大會堂公演、「糊塗戲班」製作的話劇《惡童日記第三部曲之第三謊言》，執行監製羅淑燕於國立臺北藝術大學畢業，打算在場刊的自我簡介提下母校個名，諗住係人之常情啦，點知都被康文署睇上，「建議」刪去「國立」二字，連改用英文「Taipei National University of Arts」都唔得，頂多准佢用「北藝大」這簡稱。

事件隨即被兩地文藝界人士狠批。國立臺北藝術大學校長楊其文更直斥康文署極度粗暴、不文明，甚至「跟北韓沒兩樣」。

於國立臺北藝術大學畢業的當事人羅淑燕最後接受該署的「善意要求」，唔提就唔提，不過呢，就決定成篇自我簡介，淨係寫呢句：「喺一個冇自由嘅國家生活，冇創作自由，冇言論自由，咁就足夠？」

然後，國立臺北藝術大學畢業生羅淑燕於簡介旁附上證書照片一張，上面清楚寫住8個字：「國立臺北藝術大學」。

有一種藝術人叫做型。

型完，到尋根問底時間了。唔俾「國立」見光，是否政府／康文署一貫做法呢？

唔係囉。翻查資料，回歸後不少政府刊物提及部分台灣大學名稱時，都有用「國立」二字，例如中央政策組委辦的報告啦，仲有舊年教育局的《童書學與教資源套》等等。

最重要的是，連康文署自己，在 2005 年香港藝術館《通訊》小冊子中，介紹工作坊導師鄭明時，也大大隻字寫着「畢業於國立台灣師範大學美術系」，咁幾時開始，「去國立」變最新措施？

延伸行動

建議康文署再下一城，直接向光華新聞文化中心提出，凡台灣人叫「國立」的都要改名，陳國立李國立張國立黃國立何國立等等等等，唔改名，唔俾來香港睇話劇。