「商台續牌風波」、「商台遲遲未獲續牌」、「商台為續牌跪低」……彷彿全宇宙未獲續牌的電台，就只有商業電台。咁新城仲使出嚟行嘅？

你冇聽錯，其實新城之前都未獲續牌，而昨日終於獲商經局局長蘇錦樑「賜」牌 12 年的，都有新城份。有效期至 2028 年 8 月。係咪好出奇呢？

講笑啫，大家實知道新城都有份續牌，因為……商台續到牌，而噚日條條新聞都會搭單見到新城個名。你試下 Google “新城續牌”（連引號），會見到啲乜嘢喺新城個名前面？夠膽試埋 “新城續牌風波”，搜尋結果直頭零（至少呢篇出之前係啦下）。

商台續牌就係一回事，新城就冇人理，叫人情何以堪呢？咁又唔係有心冷落阿城哥你嘅，需知道商台自 2003 年續牌起，已因先後與鄭經翰、黃毓民等名嘴解約，而惹起不少爭議；2012 年，唐英年亦於特首選戰期間，爆出梁振英疑曾建議政府僅與商台續牌 3 年，以打壓言論自由；前年李慧玲忽然被炒，更有不少人相信與今次續牌有直接關係。

雖說新城 2007 年也炒過快必，今年年初亦因知訊台台長朱明銳疑「被退休」，引發過一場「大地震」，有大量 DJ 離職，但一般認為與續牌關係不大。

延伸行動

問下身邊親友，其實有冇人真係信商台會續唔到牌。