早前「中港大戰」，部分球迷目標唔係要港隊喺世界盃外圍賽出線，而係要中國出唔到線，又名「攬炒」，所以兩度逼和國足，已幾乎開香檳咁滯，因為中國隊要出線已近乎不可能。

中國隊要出線到底有幾難？首先，噚晚贏卡塔爾係先決條件，過到呢一關已經夠難，因為國足近年根本一次都冇贏過此強敵。

其次，係要阿曼、約旦、朝鮮、伊拉克及阿聯酋呢 5 隊中，有至少 3 隊輸波或和波，但呢樣嘢同樣機會渺茫，因為佢哋阻得中國出線，自然係因為本身有咁上下實力，排名較前，加上自己都有望出線，實會博盡。

不過，運呢家嘢真係唔到你唔信，因為噚晚居然同時出現 4 大奇蹟，包括國足贏卡塔爾、阿曼輸俾伊朗、約旦輸俾澳洲，以及朝鮮輸俾菲律賓，令中國隊離奇晉身世界盃亞洲區第 3 階段 12 強賽。

其中，朝鮮話晒都打入過世界盃決賽周，實力唔知高菲律賓幾多班，所以今次輸波可以話係爆冷中之爆冷，亦變相「義助」中國出線，認真夠朋友。

延伸行動

阻唔阻到邊隊出線都好，其實都唔會令港隊之前嘅表現變得冇咁勁揪，繼續支持港隊同其他香港運動員吧！