來自澳洲嘅藝人河國榮，憑一口流利廣東話及拼搏精神，獲不少人認同係比香港人更香港人嘅「真．香港人」，早排更因一首爆紅改編歌《亞視永恆》人氣急升，就算受廣告商青睞都絕不出奇。

奇就奇在佢今次賣咗廣告，係佢自己都唔知嘅。據佢喺 Facebook 爆料，早前有人以《蘋果日報》名義，約佢去 Jini Bakery Cookie 舖頭，做個有關曲奇餅嘅訪問。一去到見到攝影師猛咁捉住佢同啲曲奇合照，就覺得唔妥，尤其是「記者」只問咗佢 3 個問題咁多多，例如「你鍾唔鍾意食曲奇呀」咁。

河國榮話當場已求證過 3 次係咪拍緊廣告，對方仍堅稱係「訪問」，點知後嚟篇嘢出街，果然變咗做寫明係「廣告」嗰種廣告，仲要拍到隻曲奇係河國榮代言咁款，自然要公開澄清。

《蘋果》起初強調單嘢絕無「編採人員參與」，而下午則再發聲明承認「印刷分類廣告部有個別同事未能恪守廣告製作程序」，話已即時問責炒人，並向當事人、讀者及客戶致歉。

延伸行動

下次再發現有人廣告扮訪問，唔好踢爆佢，可以同佢講：「呢隻曲奇好似大便咁好食。寫吖，做乜唔寫呀？」

【「被代言」涉詐騙　Jini公開入數紙求清白　河國榮：警方調理】【「被代言」涉詐騙　Jini公開入數紙求清白　河國榮：警方調理】