文：蟻蟻

每逢復活聖誕情人節Halloween（唔係故意扮高尚講English，而係用「萬聖節」都怕有人話「錯」），總有一些誤以為識好多嘢就等如聰明有邏輯的麻煩人以高你一等的嘴臉說：「慶祝些甚麼呢？」又或者懶英式幽默咁話：「原來你係基督徒咩，我唔知你係基督徒添，如果唔係典解要慶祝」之類。

就以聖誕為例，他們通常認為由於那是慶祝耶穌誕生的宗教節日，而你卻不相信耶穌誕生故事的宗教意義，所以不存在任何慶祝聖誕節的理由。他們會進而告訴你點解你會慶祝聖誕節，彷彿比你更清楚你自己，拋出諸如「消費主義作祟」、「係商家佬搞出嚟洗晒你哋腦」等等其實好多人講過、但聽落好似係佢哋自己創立出嚟嘅偉大理論。

亦由於你冇理由慶祝聖誕節，所以但凡是針對此節日作出的消費行為，尤其是Book枱食都係果啲嘢但就貴一倍仲要逼過平時的聖誕大餐，都會被評為係「做咗傻仔」，而他們則會以自己冇隨波逐流「俾人當水魚㩒」、冇買聖誕禮物俾女友，兼專登果日食麥記或麥奀記都冇俾女友埋怨為榮，並於面書高調宣揚自己如何理性有獨立思考（然後冇Like又瞓唔著覺）。

病情再嚴重一點的，還會明明自己是無神論者，卻走去辣埋啲信奉基督教的朋友，質疑基督徒慶祝聖誕節的動機或合理性，例如「明明你係基督徒點解要搵聖誕老人合照」、「關隻鹿乜事點解你張聖誕卡有隻鹿」、「你知唔知耶穌其實唔係十二月出世」、「其實聖誕節係抄異教徒拜太陽神嘅習俗」諸如此類。

對於這種我遇過不少但衷心希望係我時運低其實只有一小撮的「獨立思考人」，只想說一句：

只要我快樂，你理　得我點解慶祝聖誕？

快樂是否人生所有追求背後的終極目的，可以拗到天花龍鳳開個會討論，但「在不妨礙他人、不違反道德的前提下取得快樂是件好事」相信沒太多異議。那我「無端白事」慶祝聖誕並因而令我自己及與我一同慶祝的人取得快樂，而且該慶祝行為不致造成任何人經濟困難，那又妨礙了甚麼人？違反了甚麼道德價值？為甚麼不是一件好事？賺了的錢畢竟要洗的，那我洗錢買個袋去旅行睇場戲取得快樂如果沒有問題，洗錢食聖誕大餐以至情人節買貴花Halloween扮其實未死的神奇女俠又有甚麼問題？值不值是由你定義還是我定義？

香港已經夠壓力大，快樂指數低。我深信大部分甘願洗多少少錢慶祝聖誕的港人不是俾商家佬洗咗腦，而只是珍惜每個難得可與親朋好友愛人歡聚的機會（畢竟有假放），就算明知只是個藉口又如何。相比某些想盡辦法說服自己這些節日不值得慶祝、自我放棄一個又一個取得快樂的機會的「獨立思考人」，到底誰才是傻仔？

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）