TVB港姐小花拍《到此一遊》　 馮盈盈黃心穎：排舞排咗40小時

憑住《降魔的》一劇而爆紅的歌曲《到此一遊》近期大受歡迎，早前主唱胡鴻均與蔣志光合唱，更令這首歌紅上紅加紅，唱到街知巷聞。趁著這個受歡迎的趨勢，TVB更加搵嚟5個港姐小花嚟個《到此一遊》跳唱版。而日前（12月28日），更在See See TVB Facebook 放上《到此一遊》MV。

今天（12月29日），5位港姐小花齊聚一堂，為了明天勁歌金曲總選的開場表演進行採排。訪問時，5位均表示對明天的表演感到緊張。訪問中她們也説為了這次MV花了不少時間。

馮盈盈，黃心穎接受《香港01》訪問：「我哋女仔排舞其實已經好早就開始。因為大家本身工作都好忙，例如係夜晚通常12點先開始跳（排舞），排幾個鐘之後先有得返屋企然後第2日開工，夜晚再跳。我哋幾個真係好有心去做好同事，無論幾攰都會去排舞。」在訪問中，她們更表示排舞花了差不多40多小時，而2人進錄音室時更是搞笑。黃心穎：「其實好好玩㗎，我哋呢啲唔係歌手嘅人去錄MV。」馮盈盈：「我嗰陣時都唔識用個咪，哈哈。」

MV播出之後，不少都留言表示5人唱歌跳舞的細胞欠奉。對於網上的評論，黃心穎，就處之泰然。「我唔會成日去睇嗰啲評論，因為如果你因住人哋嘅評論去走來嗰條路，其實都幾嘥時間幾無聊。唯有做好自己下次唱好啲比你哋（網民）聽囉。」馮盈盈也補充說：「我哋係帶出咗另外一種感覺，係抒情嘅我哋係舞曲。咁其實仲好啦，鍾意原曲嘅fans可以唱番原唱，想落去disco跳舞嘅時候呢，可以用我哋首歌。」之後馮盈盈更說：「可以作埋首兒歌，叫啲小朋友都要聽埋，咁就老中青大家都可以一齊歌頌下呢首歌。所以fans唔好嬲啦。」

眾位小花之中，在MV內最搶鏡的可以算是黃心穎。因為她的手臂上有著一個大大的刺青圖案。黃心穎：「初初佢哋問我想唔想做紋身女嘅時候，都驚驚地。不過我話：『好呀。』好想因為我以前睇好多紋身嘅節目。我一直都覺得我自己一定會去紋身，當然我唔會紋咁大。可能會紋啲英文字母嘅潦草，但係我仲未諗到紋咩。（紋馬國明個英文名囉。）一定唔會紋人名囉。但係好想，我一定會係30歲前紋。」