文：蕭源

你買返嚟已經係咁？

朋友看著我的Hulkbuster，難以置信。

我買返嚟已經係咁。

我盡量學習鄭若驊嘅語氣。

朋友笑住咁散開，我暗暗後悔開Party前無收好呢隻「鐵甲奇俠」系列中最強Figure：Hulkbuster。

典解你會買嘅？

一女不識趣，續問。

點解？你細個考試成績差，媽咪問點解，你點答？因為低分囉。

想當年唐英年輸咗，台下記者問佢：

你覺得點解你會輸嘅？

唐英年木無表情答：

因為唔夠票囉。

我點解會買舊咁嘅Hulkbuster返來？因為貪心囉。呢隻Figure高達半米，入面仲可以套多個鐵甲奇俠入去，係所有男人嘅夢想之一，買嚟做土地公看門口，不知幾威。你有無試過朋友嚟屋企圍住個土地公話「好正」吖？

唔記得講，Hulkbuster原價$6000幾，炒價$12000，有錢未必買到，聽老友Coby講，2015年訂果批依家先出貨。

咁我就係網上買嘅，佢fb彈去嘅網頁嘅資料好詳細，圖文片剪接精美，開箱文中英皆齊，睇圖片，嘩！好大盒，要一個成年人先可以捧到返屋企。

然後最關鍵係呢度：只售$398。

睇到呢度，你應該知咩事。

果然，每個人都有死穴，我哋笑阿伯被電話騙案呃，阿伯咪又笑返我哋為咗舊廢鐵被人呃。

唔好意思，呢舊連鐵都唔係，係膠，啲漆仲甩甩地。望住佢用嘅材料，作為中文老師，我覺得好有「借物喻人」Feel。

富與貴，是人之所欲也，不以其道得之，不處也……

唔用正當方法得返嚟嘅嘢，我係唔會要嘅……記得落單果日，我要上堂，我教緊呢句《論語》。

如果硬要為呢件事落個「文末反思」，我會話：我同鄭若驊嘅共通點，都係抱僥倖心態（但我無犯法喎）。

2017最大瘀事，莫過於此，故為之文以志，為網民作一提示：莫貪便宜。

（P.S. 隻Hulkbuster喺文中張相入面，請自己搵）

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）