《十年》勇奪第 35 屆香港電影金像獎「最佳電影」殊榮，引發唔少爭議，好似演藝電視電影學院院長舒琪就認為，《十年》已經超越咗電影本身，代表咗香港人嘅價值觀，係香港宣言，值得攞獎；而寰亞電影老闆林建岳則批評，《十年》本身質素麻麻，攞獎純粹係金像獎政治化嘅結果，係香港電影界嘅不幸。而上述兩種看法，均有唔少支持者。

其實《十年》奪獎後，喺國內討論區同樣成為熱話，不過討論重心就很不一樣。話說呢部戲由於涉及港獨同其他政治敏感題材，所以早就吸引《環球時報》重點招呼，話套戲「自我恐嚇」、「宣揚絕望」、「完全荒誕」，而且「帶給香港社會的害處很可能大過好處」（居然承認有好處……）

為保障民眾思想不受毒害，自然要全面封殺呢部唔乖嘅電影，而封殺行動亦「連累」金像獎「遭殃」，好似當晚廣東觀眾就算開住直播頒獎禮嘅 TVB，都會睇睇下變咗蘇民峰……嘅飲食節目《食得峰騷》，可以想像有幾無癮。騰訊報道金像獎得主嗰陣，甚至索性唔提「最佳電影」（但又叫「完整名單」喎），而有關《十年》奪獎的有關字眼，亦迅速成為國內網絡世界的敏感詞。

但「禁片」從來係最有助宣傳嘅兩個字，所以套戲被咁樣封殺法，反而立即有唔少內地網民表示好想睇，微博仲有人話：「今晚應該很多廣東的孩子跟我一樣第一次知道了有一部電影叫《十年》並且很想看。」反效果，之唔係咁。

延伸行動

買唔到飛未睇點算好？唔使愁，只要留喺香港，等十年，然後打開報紙，或者就會睇到類似故事……講笑啫，正所謂十年始於今天，改變為時未晚！