【黑鏡第四季．劇評】仲講返人類應該點樣使用科技？倒退喎！
開門見山，小菲覺得《Black Mirror》第4季真係有少少失色（相信不少死忠都有同感）。小菲同廣大《Black Mirror》粉絲一樣，鍾情嗰種將真正嘅悲情結局輕輕咁收喺好似 happy ending 嘅結局裏面的諷刺方法；等你一下子準備曬嘢諗住開開心心 happy ever BBQ 嘅時候，下一秒忽然睇穿個故事結尾原來黑到爆；一秒之間立即悲從中來，夠晒從天堂掉入地獄的痛楚。
如果你要睇故事發展同對科技嘅幻想力，例如複製的代碼人在虛擬世界同真實的人類喺遊戲世界裏面的互動，又或者將人嘅意識轉移到本身身體以外呢啲想像力（呢啲小菲就唔多講了，講出嚟永遠唔夠大家自己去睇咁過癮），第4季對你嚟講其實都唔會有啲咩大問題。但如果你係想睇探討科技同人嘅關係嘅嗰份功力，可能你同小菲一樣都係抱住點都要睇晒嘅心情睇埋佢，煲到季終再低嘆一口氣。
【編按：以下內容或含劇透，逃生門在此。】
唔通《Black Mirror》被美資入主後威力盡失？變成英美合拍劇嘅關係，賣咗去第二度，target audience 唔同咗，就喺電視尺度上／人民對自己本質的猜疑上都留多咗餘地？定係因為愈做愈迷失？定係對科技的幻想黑化設定上有美國電視台畀嘅壓力？猶記得喺第1季，仲仍然係純英片創作的初代，《Black Mirror》真係黑到無語倫比。第1季第1集就強大到叫人隔住個芒都畀佢震懾嘅人豬性交場片嚇親，嗰種場面同層次，係咪已經係一只英國嘅青春小鳥一去不回來了？
《Black Mirror》一開始最叫驚為天人嘅係佢能夠呈現嗰種科技促進人類「進化」嘅狀態。最大賣點係嗰份人類面對新科技時帶來的種種始料未及嘅狀況，甚至最勁係《Black Mirror》令你睇到科技點樣去影響到人嗰份心寒，而呢種心寒令人最心寒嘅地方係你會相信不久嘅將來真係有可能會有咁嘅事情發生。
第4季雖然仍然有保留到科技促進人類「進化」嘅狀態，但係去到例如《Metalhead》（第4季第5集）嗰集，好明顯就回復返去科技本身無好壞之分嘅層面，即係話又回去「點去使用」先係最大問題嘅情況上。
喂，倒退喎！嗱嗱嗱，二十世紀開初海德格喺《技術的追問》（The Question Concerning Technology）已經開始對科技本身作出系統上的反思，提及到科技係用嚟達到目而耍出的手段。咁初代《Black Mirror》好明顯拎過出嚟發揮，但反過嚟係今時今日仍然有一集係老老土土咁講「科技好與壞在乎溝通與關懷（在乎你點去使用）」。又講返去點用呢啲科技係你自己嘅事嘅話，呢種 angle 就無咁有賣力喇。真係童年你與誰渡過……時光倒退二十年！
你知啦《Black Mirror》最叻係講啲科技到底點樣去影響人類嘅行為㗎嘛，而家褪軚倒返轉頭去講人類點去用科技喎，身為堅粉緊係覺得唔係幾夠皮。雖然未至於會嗌「除褲（回水）！」但相信一班戲迷都好想睇《Black Mirror》講科技點樣去支配人類嘅的行為、點樣去影響人類嘅思想呢啲世紀大重點！
小菲特別鍾意嘅係第4季第2集《Arkangel》：一個高度關注兒童各方面的育兒 app 如何放大老母愛女深切嘅守護 mode，順便輔助老母將唔想畀個女接觸到嘅嘢通通打晒格；呢種高度控制權暗啞底令老母愈用愈肉緊，愈肉緊愈上癮，一出事就乜都唔駛諗立即開動。而飽受所有人喜愛嘅《Hang the DJ》亦都有提及身份和存在問題，又有做到科技發展已經去到同人嘅訴求互相結合嘅地步，劇力都唔錯。
Having said that，但係無論係小菲覺得最好睇嘅《Arkangel》同外間一致覺得最正嘅《Hang the DJ》都好，都只不過係用親子對抗嘅張力同情侶為愛衝破一切的愛情力量突圍而出；對小菲嚟講《Black Mirror》第4季多咗講個人經驗，少咗講科技同人類未來嘅關係，亦都無再咩點去講技術如何主宰一個特定嘅社會。
以往《Black Mirror》嘅賣點——所謂睇到人心都寒埋嘅冷不防科技令人人性改變、新科技出現後大方向影響社會層面——通通去晒邊度？呢啲初代《Black Mirror》有做到嘅大環境，第4季已經好似一個夠錢掛住沉迷酒色玩樂變肥仔嘅足球員咁，回晒塘。不過身為死忠粉絲，眼前《Black Mirror》處處出現多季多集共享平衡時空的小 bonus 已經算係花盡心思，小菲當然選擇係好係壞壞都照單全收。
總括嚟講《Black Mirror》將個設定擺去現今人類去接觸新科技呢點係做到㗎喇，但高科技世界呈現出嚟嘅大畫面？又或者超 sci-fi 構想出嚟的未來基礎？就似乎未夠過癮亦未做得夠班。第4季的大熱都係靠人性而唔係個科技處境勾勒起大家的心。雖然唔同集數都係擺出一個共享宇宙嘅大畫面，但單集獨立敘事可以話係佢優勝同失敗的地方。一集集 standalone 出嚟，呢種分割雖然可以令人全情投入故事情節不受旁節影響，跟住畫面就去相信科技可以帶畀我地更好的生活（雖然美好通常都係好短暫），但鋪陳嘅嘢一做得唔好就叫人好難投入了，網友大打低分評價都無可厚非；而且，第4季《Black Mirror》對未來景願上的塑造都仍然係差少少。
咁睇唔睇？睇㗎！睇開咪睇埋佢囉，未睇過就無謂由第四季開波喇。由第一季睇起啦！
第四季最愛順序推薦：《Arkangel》《Hang the DJ》《Crocodile》《Black Museum》《USS Callister》《Metalhead》
（文章純屬作者意見，不代表香港01立場。）
