由上年秋季到而家，大家應該收唔少紅色炸彈，估計一直炸到復活節後、天氣熱先會減少。曾幾何時我都好驚收到結婚請帖，特別係唔熟嘅同事；自己亦講過將來結婚唔會擺酒，因為唔想煩到人又煩到自己。但最後我結婚有擺酒，擺完之後，對成件事睇法唔同哂，從此每次收到帖都好開心，不論對方同我交情深定淺，都有一種替對方高興嘅感覺。我記得擺完酒之後，有朋友問我：「終於忙完啦，畀你揀多次，仲擺唔擺酒？」擺！一定擺！

好多人認為擺酒就係無無聊聊一晚燒哂啲錢，其實對新人同雙方家庭嚟講，件事絕對唔止一晚，而係一世嘅回憶，而且由籌備到舉行當日，會經歷好多大大小小問題，呢啲亦係人生中成長嘅過程，有助新人變得成熟。

測試另一半的抗壓能力及分擔能耐

喺香港呢個福地，兩個人由拍拖到步入婚姻，其實真係好少會一齊遇到啲咩大危機／壓力爆煲嘅時刻（當然有少部份人會歷過更嚴重的生老病死）。除咗返工放工食飯睇戲，雙方合力經過半年至兩年一齊完成一個大Project確實會有很多挑戰及分歧，簡單如場地，究竟擺酒店定酒樓？個台加唔加錢換張靚地毯？聽落去好似係小事，但傾傾吓會發現這牽涉到雙方的價值觀。

放假嘅拍拖活動，由遊山玩水變成行婚展、格價、試禮服、影婚照，籌備婚禮期間嘅假期同返工相比，可能更加鐘意返工，呢個時候會唔會有一方頂唔順選擇逃避？咩都唔理畀哂另一個搞？定係手拖手一齊分擔？呢啲都可以睇到另一半將來遇到壓力嘅時候，佢會點樣處理，同埋雙方喺壓力底下處於咩角色、點分工。

可能是與家人的唯一一次角力

擺酒當然、絕對、肯定唔係兩個人嘅事，而係兩個家庭……唔係，係兩個家族嘅事！平日好少見嘅姨媽姑姐，隨便畀句意見都可以令件事複雜化，我就聽過唔少男性朋友抱怨：

我都想簡簡單單搞個Party算，但佢親戚好雀躍，好想大搞，所以……

佢姑媽嫁女時對龍鳳鐲好粗，所以……

禮金、過大禮、菜式、親戚坐位等等，都係新人需要同家人「角力」嘅事，老人家覺得要食魚翅先得體但而家興環保婚宴，食翅反而驚畀朋友笑，點樣說服家人接受？叔公一家九口想要哂一圍，剩返三個位要白蝕畀場地，點樣勸叔公理解新人難處？結婚係喜事，想盡善盡美又唔想令家人唔開心，兩者之間點平衡？擺酒可能係你成世人唯一一次要同家人不斷分歧、不斷體諒的事情，但係爭吵可以增加了解，學習互諒有助令人成熟，都不失為一件好事。而且，家人都有份出手幫你完成件事，例如係同親戚溝通、添置嫁妝、處理繁複習俗等等，種種鎖碎事都可以令新人喺變做「成人」之前感受到家人嘅愛同關懷，所以都唔係一面倒得個煩字的。

如果你無籌備過婚宴，睇到呢度你應該都仲係覺得「點解要迫我做人情」、「你結婚關我鬼事」，對於「被迫去飲」，我已經寫過一篇《婚宴人情公價的意義》。而今次呢篇係想寫畀正在十五十六諗緊擺唔擺酒，或者籌備緊擺酒嘅新人睇嘅，擺酒除咗令你對另一半、家人有新看法同新了解之外，對朋友同金錢亦會重新定義，下篇再分享。

（文章純屬作者意見，不代表香港01立場。）